Huan, Toupa’n, Martha, Martha, thil tampi na ngaihtuah a, buai nei ve; thil khat kia a kul ahi; Mari in tan hoih a teel a, huai tuh laksak ding ahi kei, achi a, a dawng hi (Lk.10:41,42).
Martha mohsak luat theihna di om kei maw? A mikhual, Toupa adia feltak a na sem hia maw? Mikhual nei a feltak leh kizen tak a om kan a thil poimoh zaw om tuan di hia? A sanggamnu Mary in a panpih luat di hia!
Hiai simkha na hihleh Pathian’ thu lunglut khristian hoihtak khat hi ding in kon ngaihtuah hi. Midangte panpih a buai gige mi, hun kidaihlou a alang-alang a midang panpihtu dia taituah gige mi na hi kha ding hi.
Ahihkeileh i buainate midang leh Pathian a ding hi khalou a, eimah hamphatna ding leh eimah nna kia ahi zaw hia?
Martha in a sanggamnu a mohsakna tuh a lungtang a Jesu koih lou a, amah kia a kibuaipih khak ziak ahi hi. A lungsim tengteng a Jesu kia buaipih a ngaihtuah hileh Mary in nna a sep leh seplouh phawk kha hetlou ding hi.
Hiai ziak in fel bukim hih ut mite’n midang iplah kha sek uhi. A tangpi in fel bukim hih ut mite’n Pathian lam sang in mihing lam a buaipih khak luat ziak uh hi zaw kha sek hi. Pathian et didan sang in midangte et ding dan a khual zaw kha sek uhi.
Khristian tampite Martha i bang sek uhi. Thil tam i ngaihtuah luat ziak un i buailaw sek uhi. I awl bawl deuh a, Jesu ngaihtuahna dia hun i piak tam zawk a, thildangte i buaipih luatte i kiamsak zek poimoh kha ding hi.
Pa aw, ka lungtang uh hon hihsiang sak in. Midang ka panpihnate uh kou kitawiletna ding hilou a, Nang hi zaw hen.
Unaute zingpha. Tuni hun zatnuam chiat.