Huan Laodisia a saptuamte angel kiang ah hichibang in gelh in: Theihpihpa ginom leh dik, Pathian thilsiam bul Amen in hiai thilte agen hi (Kil.3:14).
Laodisia khopi tuh Seleucid lalgam kumpipa Antiochus II Theos in 61-53 BC kikal a alamkhiak khopi ahia; a zi Laodice min tam in Laodicea a sa hi. Laodicea, Colossae leh Hierapolis tuh Phrygia gam a Lycus lui (river) pang a thuk thum bang a khopi kibulhtuah ahi ua, sawltak Paul in leng a laikhakna ah hiai khopite ana genkha hi (Kol.4:13-16). Ephesa khopi leh suahlam gamte kisumdawn tuahna lampi (highway) a om ahih ban ah Asia Minor a lampi poimoh teng in a tawnkha hi. Huaiziak in sumkolveina khopi poimoh tak a suak hi.
AD 61 in zinling haktak in Lycus phaizang a nawk a, hiai khopi thumte a suse vek hi. Himahleh Laodicea tuh khopi hausa mahmah ahihziak in khopi dangte banglou in Rome kumpite panpihna la utlou in amah leh amah a kitungding nawn hi. Puanbawlna leh mitlou bawlna munpi khopi minthang ahia; mitlam buaina nei teng in Laodicea khopi a zuan uhi.
Tuni i tangteel a i muh bang in hiai khopi a om saptuam mite kiang ah Jesu’n ahihna poimohte lak ah, “Theihpihpa ginom leh dik, Pathian thilsiam bul, Amen” chi in a kigen hi. Hiaite apan Jesu hihna pen a ginom leh taise ngeilou Pathian a hihna a hon musak hi. Jesu Khrist tuh thil siamtu leh a kipatna ahihdan Laisiangthou mundang ah leng i mu hi (Jn.1:3; Kol.1:16).
Khovel ah i muanpen leh i suanpente’n leng hon zuausan thei ua, himahleh hon zuausan ngeilou Jesu nei ihi chih khristiante’n theigige le hang thaphang huai hetlou hi.
Unaute zingpha. Tuni hun zatnuam chiat