Avualzoupa ka tempul ah khuam in ka pangsak dia, huai a kipan in apaikhe nawn kei ding, amah tung ah ka Pathian min leh ka Pathian khopi, Jerusalem thak min, ka Pathian a kipan van a hong paikhesuk min leh keimah min thak ka gelh ding hi (Kil.3:12).
Tuni i tangteel in a vualzoupa kipahman ding tuh Pathian tempul khuam a pan ding, Jerusalem khopi thak min leh Jesu min thak piak hi ding chih a hon hilh hi.I gentaksa mah bang in Philadelphia khopi tuh zinling hatna kuam a om, zinling munna khopi ahi chih i thei hi. Hiai bang khopi a teengte a ding in munkip, bohkhiak a om nawnlou ding khuamkip chiam in a om hi.
Philadelphia khopi in Rome kumpite deihsak thupitak a tang chih i genta hi. AD 17 a zinling in naktak a anuaisiat lai in Kumpi Tiberius panpihna toh a khopi lamthak in om a, huaiziak in a khopi min leng kumpipa zahtakna in Neocaesarea chia khek in om zual hi. Flavian dynasty (Vespasian, Titus, and Domitian, AD 69–96) hun in a khopi min tuh Flavia Philadelphia chia gen in a om nawn hi. Huaiziak in minthak piak a om pen hamphatna thupitak ahihdan hiai khopi a teeng mite’n a theichian mahmah uhi. Hiai bang mite a ding in Jesu’n min thak, Jerusalem khopi min thak, Pathian min leh Amah min mahmah piak a om ding a achiam tuh thanophuai mahmah ding hi.
Philadelphia khua a khristiante mah bang a ei leng a vualzoupa kiang a thuchiamte tang thei ding in kisa chiat ni.
Unaute zingpha. Tuni hun zatnuam chiat