Huan, Khawlni in thupiak bang in a khawlta ua; ni sagih ni masapen in; phalvak in, banghiam gimnamtui a bawlte uh tawi in, han ah a va hoh uhi (Lk.24:1).
Jesu sihni toh kisai Marka in, “huan, nitaklam a hong hih in Kisakkholhna Ni (Preparation Day) ahihziak in, huai tuh Khawlni ma a ni ahi” (Mark 15:42) chi a, Luka in “huai ni Kisakkholhna Ni ahi, Khawlni a hong tundek ziak in” (Lk.23:54) chi hi. Tulai nisim dan in Khawlni (Sabbath) tuh Saturday hi a, huai ma a ni tuh Sintawpni (Friday) ahi. Huaiziak in Sintawpni tuh Khawlni (Sabbath ni) adia Kisakkholhna Ni ahia; huai tuh Jesu sihni ahi hi. Hiai Khawlni tuh Matt.27:62 ah gendan tuam deuh in, “A zingchiang, huai bel Kisakkholhna Ni zoh in… (the next day, the one after Preparation Day – NIV) chi a gen in om hi.
Khenkhatte’n hiai a Khawlni kigen pen kalteng Khawlni hilou ahi chi uhi. Himahleh hiai a Khawlni pen Nipikal Nimasapen toh kizom kalteng Khawlni ahihdan muh theih hi: “…huai ni tuh Kisakkholhna Ni ahi a, Khawlni a hong tungdek ziak in…Huan, Khawlni in thupiak bang in a khawlta ua; Nipikal Nimasapen; phalvak in…” (Lk.23:54-24:1).
A thohnawni toh kisai ah Marka in hichin na gelh hi, “huan, Nipikal Nimasapen ni a baihtak a athohnawn in” (Mk.16:9). Hiai in Nipikal Nimasapen zingkal baihtak a thounawn ahihdan chiantak in gen hi. Huaiziak in Jesu tuh Khawlni (Sabbath) nitaklam hiam a thounawn ahi kei a, Nipikal Nimasapen (Sunday) zingsang a thounawn ahi hi.
Unaute zingpha. Tuni hun zatnuam chiat.