Hinna thu, a tung a kipan a na omkhinsa, koute’n ka zak uh, ka mit ua ka muh uh, ka et kilkel ua, ka khut ua ka khoih uh, huai hinna tuh latsak in a hong omta a, koute’n ka muta ua, huan huai khantawn hinna Pa kianga om leh koute kiang ah latsak a omta tuh noute kiang ah k’on phuang uhi. Koute’n ka muh sa uh leh ka zaksa uh mah noute kiang a zong k’on phuang uhi, huchia noute’n zong koute toh kithuahna na neih theihna ding un; koute kithuahna bel Pa toh a Tapa Jesu Khrist toh kithuahna ahi (1 Jn.1:1-3)
Bang ziak a Jesu gingta ka hia? Leitung a hong pai a, mihing a hong khosa a, kross a kilhlup a om a, ni thum sung han a vui a om a, huchia sihna akipan thounawn ahi chih bang ziak a gingta ka hia?
A ziak tuh John leh midang theihpihtu tamtakte’n (witnesses) hon hilh ziak uh ahi. Amau a mit mahmah ua amuh uh, a et kilkel uh, a khut mahmah ua a khoih khak uh thu hon gelh uhi. A thu gelh uh dik ahi chih ka gingta hi.
Bang ziak a hiai a thugelhte uh gingta ka hia? A gingta tampitak a om ziak ahi. Theihpihtute’n a thu theihte uh hon gelhkhiak kia uh hilou in, munteng a pai in a thil muh utuh a phuangzak ngam uhi. Jesu thohnawn nung kha nih le pha nailou in Jerusalem ah a ngaikhe nuam peuh kiang ah hangsan tak in sihna akipan Jesu thounawn taktak ahihdan mipi mai ah a phuangzak uhi. Theichian lua ahihziak un hiai thu ziak a sih leng a ngam uhi. A theihchian louh uh, mi gen a azak sawn maimai thil uh hileh mihai ahihkei uleh sihpih ngam hetlou ding uhi. Huaiziak in a thugente uh gintakhuai kasa hi.
Tulai a khovel mipil, misiam kichi khenkhatte’n Jesu thounawn lou ahi, kross a le silou ahi ahihkeileh a taktak a leng omlou ahi achi kha ding uhi. Amau bang achi theih ula? Ken bel mit mahmah a mu, a kihoupih kha, a thohnawn nung a akhut mahmah ua khoihkha theihpihtu tampi ka nei hi.
Khovel mipil kichite gingta zaw di maw ahihkeileh a taktak a theihpihtute thugen gingta zaw ding?
Pa aw, ka ginna uh kingakna ding Jesu theihpihtu John and mi tamtak non piakte ziak in kipahthu kon gen uhi.
Unaute zingpha. Tuni hun zatnuam chiat.