Huai chiamteh a omte lak a tampi, nuaikhat singli-le-sangli, Israel suan chiteng a kipan chiamteh zah ka za hi (Kil.7:4).
Tuni i tangteel a i muh chiamteh a om mi 144,000-te kuate ahi ua chih toh kisai ah ngaihdan tuamtuam om hi. Jehovah Witness-te’n hiai 144,000 tuh a literal a la in vangam kai a Khrist toh vai hawm ding zah ahi chi ua; Premillenialist-te’n tunung chiang a kum 7 gimthuakna hunsung a Pathian thugen a kizang ding Israel namte akipan telkhiak ding mi zah ahi, chi uhi.
Jehovah Witness leh Premillenialist-te sinsakna dan a hiai mi 144,000-te literal a la ding hile hang a dik theihlouhna tampi om hi. Israel nam 12 kigente lak ah Ephraim leh Dan namte telkha lou ua himahleh nam 12 a simtel khaklouh Levi leh Joseph telkha uhi. Literal a la hile hang Ephraim nam akipan Nun’ tapa Joshua (Nam.13:8) leh Dan nam akipan Samson (Vai.13:2) leng vangam kai khalou in, Israel nam akipan Pathian mi muanhuai telkhiakte lak ah tel khalou ding uh chihna suak ding hi. Kilakna 14:4 in hiai mi 144,000-te tuh numei lak a kihihnin ngeiloute (virgin) ahi uh chi a, literal a la hile hang Abraham, Mosi leh Peter ichihte leng zi nei ngen ahihziak un vangam kailou ding uh chihna suak ding hi. Huaiziak in 144,000 pen literal a lak theih hilou hi.
Kilakna laibu tuh chiamtehna zang a kigelh ahihziak in (1:1), hiai 144,000 leh nam 12 kigente tuh gentehna thumalte ahi zaw uhi. Salam Israelte genna hilou in khalam Israel, Pathian’ saptuam mite genna ahi zaw hi. Saptuamte tuh “Pathian’ Israelte” chih in a-om a(Gal 6:16), Israel nam 12-te bang a gen in leng om hi (Matt.19:28; Lk. 22:30; Jak.1:1). Kil.14:4 ah hiai mi 144,000-te tuh Belamnou a ding a gah masapen hi ding a leisate ahi uh chih i mu a; saptuamte tuh “Pathian adia gah masapen” leh “Jesu Khrist’ sisan a leite” ahi uh chih i mu hi (Jak.1:18; Nas.20:28).
Kilakna laibu ah mihing nam nih bukkak in omtou ngitnget ua, huaite tuh Pathian’ chiamtehna neite (7:3; 14:1; 15:2; 20:4; 22:4) leh gamsa chiamtehna neite (13:15-18; 9:4; 14:9-11; 16:2; 19:20) ahi uhi. Pathian leh Setan kidouna thu kia hilou in, Pathian’ mite leh Setan mite kidouna thu gentehna kampau a dramatic tak a genna laibu ahi hi. Pathian’ chiamtehna leh gamsa chiamtehna kichite a taktak a i tal a kigelh hilou in, khalam thil ahi zaw hi. Pathian in mihing lungtang teng a thei a, i hihna a theihna ding in i tal a hon chiamteh ngai zenzenlou hi (1 Sam. 16:7).
Hiai mihing nam nihte kigente lak ah nang koilam ah na om kha a chihte ki-en a, Pathian lam a pang mite hi chiat ding in i kichial hi.
Unaute zingpha. Tuni hun zatnuam chiat