Huai laltutphah tung a tupa khut taklam ah laibuzial, asunglam leh apolam kigelh chiamtehna sagih a kichiamteh ka mu hi. Angel hat khat in aw ngaihtak in, “Kua ahia laibuzial hong a, huai a chiamtehnate phel tham?” chi a puangkhia ka mu hi. Huan van tung hi in, leitung hiam, ahihkeileh lei nuai ah leng huai laibuzial hong thei hiam, ahihkeileh atung en thei kuamah a-om kei hi. Huchi in huai laibuzial hong a sim tak hiam, ahihkeileh atung en tak kuamah a-om louh ziak in ka kapkap hi (Kil.5:1-4).
Saptuam sagihte kiang a laikhak dingte theihsak a om zoh nung in Kilakna 4 ah Johan tuh “hiai khit chiang a thil tung dingte ka hon lak ding” chia van a saptouh in a om hi. Huchiin van a Pathian a laltutphah tung a thupitak a tu tuh a muta hi. Bung 5, tuni i tangteelna ah Pathian in a khut taklam ah laibuzial, asunglam leh polam a kigelh, gakkipna thuah sagih a kigakkip a mu hi. Tuni i tangteel Parallel Bible ah gakkipna thuah sagih a kigakkip chi in kilet a, genkha zaw abat ziak in huai i zang hi.
Huchiin Angel haat khat ,“Kua ahia hiai laibuzial tuh hong a, huai agakkipnate phel ding a chitna nei?” chi’n hong kikou a, himahleh leitung leh leinuai ah huai Laibuzial hong ding a chitna nei kuamah a om kei hi. Laibuzial hong a, sim a, a en ding a leng chitna nei kuamah a om louh ziak in Johan tuh nakpitak in a kap hi.
Johan dinmun a ding in kikoih le hang Rome Kumpite sawina nuai a gimthuakna thupitak thuak a om, maban bangchi ding ahi de aw chia thei nuam mahmah a a-om ding lai a, huaite musak ding a van a saptouh a om in, khovel kumpite tung a vaihawmtu Pathian’ khut taklam a om huai laibuzial kigelh dim mitmet amuh tuh bang thu ahi peuhmah de aw chi in theinuam mahmah ding hi. Himahleh a laibu hong a, sim a, en ding a le chitna nei omlou chih tuh mihing lam ah lungkhamhuai mah ding hi.
Johan bang in khat veivei Pathian’ thiltupte i muhbat nailouh ziak in mihing a i kinepnate a thawn lel bang a mu in, lunglel kisa a, khasia in om theih hi. Ahia tuni i tangteel ban leh Kilakna maban i simzom leh laibuzial hong ding a chitna nei mihingte om kei mahleh i Toupa Jesu Khrist, mihingte’n thahsa dan a atheih uh om ahihdan muhtheih hi. Tuni’n leng mihing a i kinepnate tengteng abei nung in leng i Pathian om lai ahi chih theithak zel in, lungkiat hun ah leng Amah ah kihihhat zel lehang khatvei tei vualzohna ei a hi thouthou ding hi.
Unaute zingpha. Tuni hun zatnuam chiat.