Huan huai amah laltutphah tung a tupa leh, huai amah khantawn khawntawn a hingpa kiang a gan hingte’n, thupina leh zah omna leh kipahna thu a piak chiang un, huai amah laltutphah tung a tupa ma ah, huai upa sawmnih-le-lite a khupboh ua, huan huai amah khantawn khantawn a hinpa tuh a bia uhi, huan laltutphah ma a a lallukhute uh koikhin, Nang ka Toupa uh leh ka Pathian uh, thupina leh zah omna le thilhihtheihna mu tuak na hi; thil tengteng nang na siam a, huan nang thu ziak in om leh siam ahi uhi, a chi uhi (Kil.4:9-11)
Johan in Laltutphah leh a tung a tu Pathian’ thupina hon genna ah, “Laltutphah a tupa Jasper suang leh Sardius suang abang a, a Laltutphah kiim ah Sakhituihup om a, Emerald suang bang mai in a etlawm,” achi hi. Laltutphah a kipan Kawlphia, Vanging leh Awte pawtkhia a, a kiimvel ah laltutphah 24 om in, huai laltutphahte tung ah upa 24 a tu uh, chi hi (4:3-5).
Thilhing 4 leng muh in om ua, amau tuh kha (wings) 6 a nei ua, a pumpi uh Mit (eyes) in dim hi (4:6-8). A melput uh bel Sahang mel, Bawngnou mel, Mihing mel leh Muvanlai mel ahi hi.
Hiai Pathian’ laltutphah omna mun leh huai a thil omte tuh Zawlnei Ezekiel in leng kum 700 vel paita a ana mu khinta ahihdan i genta hi. Ezekiel Bung 1 ah Thilhing 4-te’ tanchin leh Sakhituihup muh theih hi. Aman huai Thilhing 4-te tuh Cherub-te ahi uh chi’n a hon hilhchian hi (Ezek. 10:20). Huai Thilhing 4-te’n (Cherubim) sun leh zan in tawplou hial in “SIANGTHOU, SIANGTHOU, SIANGTHOU; TOUPA PATHIAN HAT; OMSA, OMLEL, LEH HONG OM DING” chiin Pathian a phat uhi (Is.6:3).
Hiaite ban ah Kha Sagihte leh adangdang leng a mu hi. Laltutuphah ma ah Meikuang 7-te kuang den ua, huai Meikuang 7-te bel Pathian’ kha 7-te ahi uhi. (4:5). Huai Laltutphah kiang nai ah Kithoihna maitam kidoh a-om a (6:9; 8:3), Pathian’ Thukhun Bawm leng A laltutphah omna mun ah muh in a om hi (11:19). Huai Laltutphah mai ah tuh Kristal suangmanpha toh kibang, tuipi bang mai in Limlang a om ziahzuah hi (4:6).
Rome kumpite lim be nuamlou khristiante sawi a, that a, gentheitak a bawl ahihlai ua van Pathian a thupina toh a Laltutphah atu a, Aman thuneihna tengteng tawi ahihdan leh khovel kumpite hilou a, thil tengteng siam Amah kia biaktaak ahihdan muhsak in bang chi phet in khamuanna a tun dia! Pathian in a tate hon mangngilhta ahi diam, hichi lawmlawm a bawlgentheihna hon tuahsak chia ngaihtuah vungvung khristiante a ding in “God is still in control” chih theihna in khamuan tuan mahmah ding hi.
Unaute zingpha. Tuni hun zatnuam chiat