Huan upate lak a khat in ka kiang ah, “Kap ke’nla ngai in, Humpinelkai, Judah nam a, David Zung in, laibuzial hong thei ding leh huai a gakkipna sagihte phel thei ding in avualzouta,” achi hi. Huan huai laltutphah leh huai thil hing lite leh huai upate lai ah thahsa hileh kilawm, Belamnou, kii sagih leh mit sagih nei dingh ka mu a, huai mit sagihte Pathian kha sagih leitung tengteng a sawlkhiakte ahi uhi (Kil.5:5-6).
Pathian’ khut taklam a laibuzial, gakkipna thuah sagih a kigakkip hong thei ding a chitna nei a omlouh ziak a lungkham a Johan a kah lai in, Pathian’ Laltutphah kim a upate 24-te khat in, “Judah nam akipan Humpinelkai, David Zung akipan mi khat hiai laibuzial gakkipnate hong ding a chitna nei om ahi,” achi hi. Hiai mi khat tuh Jesu Khrist ahi chih i thei hi. I Toupa tuh Judah nam akipan David suan a hong piang ahi hi.
Gen.49:9-10 ah Jakob in a tapa 12-te a vualzawl lai Judah tungtang ah hichibang in genkhol hi, “Judah bel Humpinelkai kual bang ahi… Lalchiang (scepter) amah a kipan laksuan ahi ngeikei ding”. Judah a kipan Humpinelkai hong suak ding gen a om pen David Zung ahihdan Isai 11:1 ah hiai bang a gen in om hi, “Jessai (David’ pa) zung a kipan Hiang a hong khangkhe ding…”. Hiai a Hiang hong khangkhe ding gen a om pen in “a laltutphah a kipan vai a hawm ding a, a laltutphah ah Siampu ahi ding” chi’n zawlnei Zekariah in ana gen hi (Zek.6:12-13).
Israel namte’n a lamet uh Judah suan, David Zung a kipan hong piangkhe ding Messiah in a sikchiang toh vai a hawmta hi. Huaiziak in tuni i tangteel ah laibuzial hong thei ding leh huai a gakkipna sagihte phel thei ding in avualzouta chih i mu hi.
Huchiin Johan in upa 24-te lai ah thahsa hileh kilawm Belamnou a dingh (stood) a mu hi. Belamnou tuh a sisa hitalou in, ahing a dingh in muh ahita hi. Jesu Khrist tuh khovel theih a thahkhit, a sisa himahleh a si hitalou in gamsa lauhuai Humpinelkai bang a vaihawmtu ahi zaw hi.
Hun tamtak a khristiante’n i Toupa Jesu tuh Belamnou bang a anunnemna kia ngaihtuah in, a lauhuaina lam kingaihtuah kha khollou sek hi. Tuni i tangteel a i muh bang in ganhing nunnem Belamnou mai kia hitalou in gamsa kumpi lauhuai Humpinelkai bang a vaihawmtu ahita chih thei lehang sawina leh haksatna tuamtuam i tuah hun ah leng tha hon pe mahmah ding hi.
Kumzabi khatna hun a khristiante’n Rome kumpite apan amau panpihtu ding omlou bang khop a akingaihtuah lai ua, thahsa hitalou a, Humpinelkai bang a vaihawmtu ahita chih theihchetna in a melmate uh alauhna ua kipan lungmuan tuan mahmah ding hi. Amaute mah bang in en leng Pathian thutak a i panna ziak a khovel kumpi leh thil tuamtuam ziak a sawinate i tuah hunte ah hiai thute theichian in kikhamuan zelzel le hang khalam ah kibahlou ding hi.
Unaute zingpha. Tuni hun zatnuam chiat