“Ephesa khua saptuamte angel kiang ah hichibang in gelh in: A khut taklam a aksi sagih tawi dangkaeng tuikuang koihna sagih lai a vialvakpa’n hiai thilte a gen hi (Kil.2:1).
Tuni i tangteel a i muh Ephesa khua a saptuam kiang a laikhak khaktu Jesu Khrist ahihdan Kilakna bung khat i gennate apat muhtheih hi.
Ephesa khopi tuh Rome kumpi ukna nuai a om Asia gambup (province) adia a khopi (capital) uh, Aegean Tuipi gei a om, khopi hausa leh minthang khat ahi. Tulai a Turkey gam sung a om ahia; long khawlna munpi (harbour) leh kisumdawn tuahna mun poimoh pen khat ahi hi. Rome khopi a sawi dia a puak uh khristiante a koihkhawmna mun uh leng ahih ziak in sawltak Johan’ nungzui hi dia gintak, laigelhtu Ignatius in Martarte’ Lamlian (The highway of the Martyrs) chi’n a na minvuah hial hi.Milim biakna lam a kulmut mahmah, Diana (Greek min Artemis) biakbuk thupitak omna mun ahi (Nas.19:27-28). Hiai biakbuk tuh tanglai (ancient) khovel a thil lamdang sagihte lak ah telpha hial hi. Diana biakbuk ban ah ah Rome kumpi Hadrian biakbuk leng tunkhiak in om hi.
Dangka sektu Demetrius in Ephesa khua a Diana pathian lim a bawl tuh nawi toh kidim, siampu kizuakte tungtawn in thanghuaitak a biakna neih in omsek hi. Hiai Ephesa khopi ah thanghuaitak a nu-le-pa kal kizatna uang mahmah a, khovel thilte nakpitak a poimohna piak in a om.
Kilakna 2:1-7 i sim leh hiai saptuam tuh Jesu’n a theichian mahmah a, a hoihna uleh hoihlouhna uh a tel mahmah hi. Tuni a saptuamte leng Jesu’n hon theichian mahmah ahi chih thei in, tuni bang a lai hon khak di hileh bangchi’n a hon gen dia chih ki-et poimoh hi.
Unaute zingpha. Tuni hun zatnuam chiat