Himahleh na itna masapen na tawpsan thu ah k’on dem hi. Huaiziak in na pukna laitak theigige inla, kisik in, na thilhih masapente hih nawn in; huchilou in zaw na kiang ah ka hongpai dia, na kisik kei leh a omna kipan in na tuikuang koihna ka suan ding hi (Kil.2:4-5).
Ephesa khua a Tanchinhoih nasepna i et leh Sawltak Paul in a missionary khualzin nihveina ah ana pha a (Nas.18:19-21), Apollos in leng phatuamngai tak a Pathian thu a hilhte ahi uhi (Nas.18:24-25). Khelh ngaihdamna dia Jesu Khrist min a baptisma tangte leng ahi uhi (Nas.19:5 cf.2:38). Paul in a khualzin thumveina ah kum thum phial om in Pathian thu im neilou in a hilh hi (Nas.19:1-10; 20:31). Tyrannus school (kisinsakna mun) ah nungzuite niteng in kum nih phial thuhilhna a nei zel hi (Nas.19:9-19). Ephesa khopi a a-om sung in Pathian in a khut in thillamdang taktak a hihsak a (Nas.19:11), mitkhialdawi tawi tampi’n leng a laibute uh hontawi khawm in mi tengteng mitmuh in a hal uhi (Nas.19:19). A paisan nung in leng Ephesa laikhak a khak ban ah Timothy leng amaute kem ding in a om sak hi (1 Tim.1:3).
Thukhun Thak a evangelist minthang taktakte nasepna saptuam hinapi in AD 95-96 vel a Jesu’n a laikhakna ah demna a nei chih tuni i tangteel ah muhtheih hi. A hoihna uleh pahtakna tampi agen a, himahleh saptuam a dinkhiak tuung a itna a neihte uh mansuahta ahihziak un a dem a, kisik a, a thilhih masapente uh hih nawn ding in a hilh hi.
Saptuam sung a unaute lak a kinuamtuamna beita a; kituahlouhna, kilungsim-uina, kimuanmohna leh kiselnate’n mun lian a luah zawta hi. Sinsakna diklou leh khelhna pen pampaih ding Toupa sinsakna himahleh, itna masa toh khekkhia ding in hon phallou hi. Tuni a Pathian saptuamte leng i dinmun hiai bang a hihkhak ding lauhuai mahmah hi.
Saptuam sung a thudikloute i khawkngaih kawmkawm in unaute lak ah itna toh kitundingtuahna pibawl poimoh hi. Kivelthak chiat le hang, saptuam a dinkhiak tuung a unaute ki-itna, khristian masate mah bang a i neih teng kikop utphial a kingaihnatnate mansuah in a om kha diam chihte ngaihsut huai hi.
Unaute zingpha. Tuni hun zatnuam chiat