Huaiziak in, huchi tel a theihpihte meipi thupi umsuak a i om thei in, hon hihnok (delhgik) peuhmah leh khelhna eimah a belhte koihmang ni, huan, i ma ua kitaitehna ding om ah kuhkaltak in tai ni (Heb.12:1)
Kitaidemna a telte’n a nung a vangik, a hihnok thei ding pua in tai ngeilou ua; en leng hon delhgik thei ding thilte puakbeh a tai i sawmlouh poimoh hi.
I khalam a hon niamsak thei vangik bangzah hiam om hi. Khenkhatte i en ding:
Sepna: Pathian vualzawlna toh sepna hoihtak i neihte hamphathuai a, diktatna leh chihtakna toh i sep poimoh hi. Himahleh hiai vualzawlna pen i khalam hon niamsaktu hi nuam mahmah hi. I hun, i ngaihtuahna leh tha tampi piak ngai a, huaite’n hon gimsak in, Pathian a ding a hun i piak dingte tanpha hon nelhsiahsak thei hi. Hiai kikal bulhtuahsiam poimoh mahmah hi.
Midang toh kal: Ginglou mite lawm leh vual neih poimoh tham a, amaute lak ah i vak i tansak ding mah ahi. Huchih kawmkawm in i khalam tanpha hon bahsak thei ding a kizopna i neih khak ding kiven poimoh hi (2 Kor.6:14).
Mahni kimohsak: I diklouhna kithei a, moh ka hi chih kitheih thilhoih ahi. Himahleh hiai in i hun paisa a khosakna leh hun paisan a taan detna hon tun thei hi. Pathian hehpihna ziak a hotdam a omta ihi chih kithei a (Eph.2:8); hun paisate a paisa thil a koih a, maban ah Pathian deihdan omte delh a khosak zawk poimoh hi (Phil.3:12-14).
I khalam kitaihtehna ah kulkal tak a tai a, hon delhgik thei thil khelhnate koihkhia a maban sawn chiat din panla ni.
Unaute zingpha. Tuni hun zatnuam chiat.