Huchi’n, amah a Pathian kiang a hong paite tuh a tawp dong in a hondam thei ahi, amau thumsak in khantawn a a hin gige ziak in (Heb.7:25)
Tulai khovel a kithang customer care kichi banking, lenna ticket leh company tuamtuamte’n a bawlte uh i phone chiang in tangtak in a mi toh kihou khak pahpah theihlouh in, computer in hon dawng masa zel a, huchiin in hiai number mek in chi in hon hilh toutou a, a tawp chiang in a mihing mahmah toh kihou khak in om thei hi. Himahleh a mihing taktak toh kihou a i buaina i gen theihna ding in hun sawttak lut a, ninhuai baih mahmah hi. A customer care a tu mite mahmah toh i kihou khak a, i buaina i gen chiang a hon panpih theihlouh zawk mah chiang un ningkitel huai mahmah hi.
Thugelh (article) khat ka sim khakna ah kumlui pasa ah tuabang a customer care phone bawl seh thum suah seh nih in ning kitel in a mihing mahmah toh a kihou khakma un phone koihkik (hung up) uh kichi hi. Hiai bang a call bawl kha ngeite’n a ninhuai dan i thei mahmah ding hi. Hiai mek inla, hiai number mek inla hong kichi den, a tawp in i kihou theih hun ah leng i buaina pen hon sukvek pih theilou zomah uhi.
Jesu Khrist, Pathian Tapa in nang leh kei hon kingaksak lou hetlou a i houpih ut teng a tangtak a kihoupih theih geihgeih chih nak hamphathuai maw! Niteng, hunteng, suty ni chih omlou hi zomah. I gennop teng chimlou a hon ngaikhia, hon ning ngeilou, i haksatna teng a hon panpih thei gige hi zomah lai.
Jesu a lawmhoih i neihdan!
Pa aw, lawmhoih non piak ziak in kipahthu kon gen uhi.
Unaute zingpha. Tuni hun zatnuam chiat.