Douna hoih tuh ka dou khinta, kitaitehna tuh ka tai khinta, ginna tuh ka lenkip paisuakta (2 Tim.4:7)
Kisikna om hetlou hi.
Khristian tamtakte a ding in hiai bang a hangsan tak a kampau kichi mang lam a leng mat phaklou ding thil a bang phial hi. I hun tamtak a thawn a mangsak in, hun tamtak ah i Pathian i na zuausan sek uhi.
Hilehleng, tuni i tangteel gelhtupa’n amah hinkhua a kigenna ah “Pathian gensepa, sawipa leh hihsemi” ka hi akichih mangngilh kei ni (1 Tim.1:13). A hinkhua a a thilhih khakte ziak in mikhialte lak a leng “akhialpen” ka hi, a kichi hi (1 Tim.1:15).
Sawltak Paul in gingtute suangkulh a khum in khristiante’n a thuakna ding uh thil tamtak a bawlkhia hi. A khut tuh sisan toh a kidim hi. Stephen suang a denlup ding deihte lak ah atel a, khristian tamtakte sihna lemsatu in leng ana pang hi (Nas.7:58; 26:10).
Hinapi in, tawldam tak in a si thei hi. Bang ziak ahi dia?
A ziak nih a om hi:
- Khatna ah, Pathian hehpihna a muang ngam hi: “i Toupa hehpihna tuh, ginna leh Khrist Jesu a itna in nakpitak in a dimletta” (1 Tim.1:14).
- Nihna ah, Pathian in hunlem a piak nawn (second chance), a hinkhua adia Pathian’ thil deih hih buchinna ding in a kipumpiak hi.
Kisikna hinkhua toh hun zang na hihleh, tu mahmah in Pathian’ zahngaihna pom in! Mahni kiginglel leh kihehpihna in hun zang ken. Pathian mai ah a chinglou leh phulou mah ihi. Hiai tak ahi hehpihna om sak. Hiai Pathian akipan thil thawnpiak pom ding in kiniamsak in.
Pathian thil thawnpiak na pom khit chiang in nang leng na hinkhua Amah a ding in pethuk in; huchiin kisikna omlou in kipahna toh hiai kitaitehna na zou thei sam ding hi (Rom.12:1,2).
Unaute Toupa’ ni zingpha. Tuni kikhop nuam chiat.