Hiai thugen a dik ahi. Hiai thilte na phut chiltel k’on deih ahi, huchia Pathian gingta sate’n thil hoih hih ding a a pilvan theihna ding un; hiaite tuh mihingte a di’n a hoih in a phatuam uhi (Tita 3:8).
Tita in a phut chiltel ding a Paul in a deih, “thugen dik“ leh “hiai thilte“ achih bang ahi dia?
Thumal khat in gen le hehpihna (Grace) ahi chih a thutuun 3:4-7 kikal i sim leh muh theih hi.
Lamdang a bang maw? Bang chi dan a hehpihna in Pathian thupiak zui dia gingtute a pilvan theihna ding ua hanthawn kha ahi dia? Bang ziak a hehpihna in thilhoih hih dia thanuamsak ahi dia?
Hehpihna in thumanna leh thilhoih hih dia thathousak thei ahi chih i ngaihtuah khaklouh ziak in a khenchiang in hehpihna thu hah gen luat ding bang nuam i saklouh hun om thei hi. Hehpihna thu i hah gen luat ziak a mimal mohpuakna omlou i sak khak a, “lau leh ling kawm in na hotdamna chiat uh sem khia un” (Phil.2:12) achih i mangngilh khak ding kilau hi.
Himahleh, a taktak in Pathian hehpihna thu gen in, theisiam in, ngaihtuah in, hinpih le hang niteng a khelhna i douna ah pilvanna leh ngaihkhawkna hun tun zaw ding hi. I hotdamna lau leh ling kawm a i sepkhiak theihna ding a khemna i tuah lai a leng hon hehpihna ziak a i taikhiak theihna ding lampi hon bawlsak gige ahi chih ngaihtuahna kan a hon khamuan ding dang omlou hi. I thuman theihna ding a hon thathousak thei kingakna taakpen leh hoihpen ahi zaw hi.
Unaute zingpha. Tuni hun zatnuam chiat.