Himahleh, unaute aw, na lak ua semgim leh, Toupa a na heutu ua om leh, nou hon hilhte thei ding in k’on ngen ahi; A nna sep ziak ua itna ngai thupi mahmah di’n. Kituak in om un (1 Thess.5:12,13).
Pathian adia nasem evangelist-te, hon enkoltu saptuam upate, panpihtute (deacons) leh saptuam sung a Pathian adia pangte mipite’n zahtakna pia a, a nasep ziak ua ngaihthupi ding tuh i mohpuakna ahi hi. Himahleh hun tamzaw ah zahtakna pia a ngaih thupi sang in a chitlouhna uh mu a, phunsan leh gensiat in a om sek uhi. Amau tuh a pilpen, a siampen leh a haupen ahihziak ua ngaih thupi a zahna piak ding hilou in, a nna a sep uh Pathian ahihziak a ngaih thupi a zahna piak ding ahi zaw hi. Amaute i muhdan leh i koihdan in i khalam dinmun diktak hon lak ding hi.
I lak a semgimte, hon heute leh hon thuhilhte leng eimah bang a mihing ahihziak un, a chitlouhna uh i muh leh gensiat thoh lou a thumpih a, a haksatnate uh theihpih a, amaute’n Pathian’ nna hoihtak a asep theihna ding ua panpih a, saptuam mipite kituaktak a-om tuh i biak Pathian hon deihdan ahi hi. Sawltak Paul in a pianthakma a khristiante sawi a akingaih lai a Jesu Khrist sawikha ahih bang in, i lak a semgimte, hon heute leh hon thuhilhte nuaisiah i kisak lai a, a nna asep uh i Pathian nuaisiah ihih khak ding lauhuai mahmah hi.
Tuni i tangteel a i muh bang in a nasep ziak ua itna a amaute ngai thupi, kituak tak a om saptuam mipite hi chiat theih din Pathian in hon vualzawl chiat hen!
Unaute Toupa’ ni zingpha. Tuni kikhop nuam chiat.