Nou mahmah, nou Philippite ngei in leng tanchinhoih om tunga kipat, Masidonia gam a kipan a ka pai nung in, nou chih louh ngal saptuam dang kuamah in piak leh muh lam thu ah, hon pe kei hial uh chih na thei uhi. Thessalonika khua ah leng ka taksapna awng n’on huksak zel uh a. Thilpiak ka zon ziak ahi kei a, himahleh nou a ding a gah pung tuh ka zong ahi zaw hi (Phil.4:15-17).
Philippi saptuamte’n Tanchinhoih genna leh a haksatna a Sawltak Paul apanpih utoh Paul in kipahthu a gen kawmkawm in, “amau (Philippite) adia gah pung” hi zaw ahi, achi hi. Huaiziak in Tanchinhoih gentute panpihna i piakte ei a petu saptuamte leh mi malmalte adia i hamphatna ding hi zaw ahi chih i mu thei hi. Tanchinhoih nasepna a i telkhaklouh chiang in huai hamphatna i neih ding kinei khalou, kitang khalou hi zaw hi.
Unaute Toupa’ ni zingpha. Tuni hun zatnuam chiat.