Unaute aw, tangkhinta in ka kingai kei a: ahihhang in thil khat bel ka hih – nunglam a omte mangngilh in malam a om pen ka delh hi; Khrist Jesu a Pathian sapna sang kipahman mu di’n phak chiamna tuh ka delh hi (Phil.3:13,14).
Hun tamzaw ah i lungkhamnate hun paisa thute ziak bang leh hong tung nailou thute ziak bang ahi sek hi. I mangngilh dingte bang mangngilh thei hetlou hinapi in i theih det dia hoihte bang ki-mangngilh zawsop hi. Paul in nunglam a omte ka mangngilh achih bang mah in hun paisa thu, mangngilh dia kilawmte mangngilh dan kisin poimoh hi. I mangngilh dingte i mangngilh louh chiang in maban kisuan theilou a, huai in i hinkhua hon sukha zaw sek hi. Huaiziak in hun paisa thute a khosa hi nawnlou malam suan a, Pathian sapna sang kipahman mu din kuhkal tak in pang ni.
Unaute zingpha. Tuni hun zatnuam chiat.