Hiai nnasepna a etkhiak a om in Khrist Tanchin Hoih lam a na thugin uh na zuih dan thu uh leh, amau a ding leh *mi tengteng* a dia thilpiak a na thil phaldan un Pathian na hihthupi ding uh ahi (2 Kor.9:13).
Tuni i tangteel ah “mi tengteng” kichi thumal a om ziak in unau khenkhatte’n Toupa’ ni thilpiak tuh misiangthoute panpihna a zat ding ahi chih ngaihdan neite saptuam apan nohkhia in disfellowship bang hon ban bawl zozen uhi. Hiai thumal English version tuamtuam KJV leh NKJV chihlouh a tamzaw ESV, NASB, ASV, NIV, etc ah “all men” chih omlou hi.
Tuni i tangteel a mi tengteng kichi thumal in misiangthoute gen ahi diam ahihkeileh ginglou mite chih i theihtheihna ding in a thutuun poimoh mahmah hi. Anung-ama (immediate context) leh hiai thu toh kisai Laisiangthou tang dangte (remote context) a akigen khakna teng ah “misiangthoute a ding” chih ngen agen in om a, ginglou mite a telkhak theihna ding uh a kigenna omlou hi (1 Kor.16:1; 2 Kor.8:4; 9:1, 12; Rom.15:25, 26, 31).
Mi tengteng chih thumal kia i et in ginglou mite leng huamkha thei mahleh kuate gen ahia chih a context ah kinga hi. Hiai dan Laisiangthou tang dang ah leng a kizatna hunkhop muh theih om hi. Paite Laisiangthou akipan etsakna ding in Paul in Timothy kiang ah, “Saptuam upa a hekna uh tuh, theihpih nih hiam kam a lou zaw la ke’n. Mikhialte tuh mi tengteng ma ah taihilh in, midangte’n leng a lau theihna ding un” chi hi (1 Tim.5:20). Hiai tang a mi tengteng kichi thumal in ginglou mite leng huamkha thei mahleh a context i et chiang in saptuam upa thil hihkhialte ginglou mite mai a tai ding chihna hilou in saptuam mipi, misiangthoute mai ahi chih theihtheih hi. Huaiziak in mi tengteng chih thumal om ziak a ginglou mite genna ahi chihna hi teitei lou in, ginglou mite ahi hia ahihkeileh gingtute gen chih a thutuun ah kinga zaw ding hi.
“Nna semtu, zumna ding neilou, thutak thu diktak a khendik, Pathian pomtak hi ding a nangmah kipe ding in theihtawp suah in kizil in” (2 Tim.2:15).
Unaute zingpha. Tuni hun zatnuam chiat.