Huan, Jesu’n a kiang uah, Chihtaktak in chihtaktak in k’on hilh ahi, kuapeuh thil hihkhial tuh, khelhna sikha ahi (Jn.8:34).
Khristian hoihtak himah lechin na lawmte’n na omdan hon hehpih in poi hon sakpih ngei uhiam?
A huchih hun om hi. Nopsak bawlna hun tuamtuamte lah neilou, midang in hun nuam tuamtuam a zang sek uh. Nang huaite zapih theilou a na om ziak in poi hon sakpih zaw kha sek uhiam? Nopsak ding dan le theilou. Phallouh tam lua, dawn theihlouh, hihtheih louh tam lua. Na nopsak theihna leh zalen theihna teng koihkhia (surrender) na hi. Na hinman om kei!
Himahleh a theihlouh uh om hi. Utut a zalenna achih pen uh saltanna lauhhuai pen ahi zaw hi. Amau tuh a nopsakna uleh lunglutna sal a tang ahi zaw uhi.
Paunakte laibu in hiai bang zalenna tuh haina ahi achi hi. Mihai tuh Toupa kihtakna in a thunun zou kei a, amah lungtang nopsakna in a khosa zaw hi (Pau.1:7; 3:5,6). Hiai bang zalenna in thuakna thupitak hon tun zaw hi (Pau.1:20-33). Haina in bangziak a haksatna tuak ihia chih hon theikhe sak ngei kei hi. “Migiloute lampi khomial bang ahi: a kisuihna uh a thei kei uh” (Pau.4:19). Haina in i mit hon mialsak in hon mangthangsak hi. Khomial lam hon naihsak deuhdeuh in Pathian’ thu ngaih utlouhna hon tun. Huchiin in a lauhhuai penpen KHELHNA sal ah hon tangsak hi.
Hiai sal akipan i suahtak theihna ding lampi a om hi. Jesu’n, “Ka thu a na om gige uh leh, ka nungzuite na hi taktak ding uh; huan, thutak na thei ding ua, thutak in a hon suaktasak ding” achi hi (Jn.8:31,32).
Unau, Toupa sapna ngaikhia in! Mialna akipan pawtkhia in, vak ah hong lut in! Jesu kiang hon zuan in!
“Mi diktat lampi tuh nisa vak bang ahia, sun tanglai dong a vakpha deuhdeuh toh a kibang hi” (Pau.4:18).
Pa aw, kou kia a non sutsiat louh ziak in ka kipak uhi. Na thutak, koute hon suahta sak, ziak in kipahthu kon gen uhi. Mialna sal a tang peuhmahte ziak a hiai zalenna tangkoupih thei din hon panpih in.
Unaute Toupa’ ni zingpha. Tuni kikhop nuam chiat.