Huan, huai ah kum sawmthum-le-giat damlou mi kua hiam a om a. Huan, Jesu’n a lum tuh a mu a, huchibang in sawtpi a omta chih a thei a, a kiang ah, Hihdam na ut hia? a chi hi (Jn.5:5,6).
Hihdam na ut hia?
Damlou khat kiang a hiai dotna dot tuh thil haihuai a bang hi. Himahleh Jesu’n a dotna ziak om hi. Bang ziak ahi dia?
Damlou tampi hihdam utlou om uhi. Mahni hinkhua kisuse dia khosa ki-om kha sek hi. Haihuai tak a thupukna i lakkhelhte mah kibawl kha thakthak sek a, huai i saltanna a om nuam kisa zomah lai hi. Zalenna lau mah bang in i saltanna akipan i zalenna ding kibawl utlou sek zomah hi.
Ei i ut kei leh ei utna telloupi in Jesu’n bangmah hon pelou ding hi. Kuamah thagum in kizuisak ngeilou hi. Jesu tuh Belampu ahia, bawngching mi hilou hi. Bawngching mi’n bel hawl in hawl thoh a, himahleh belampu in bel makaih thoh hi. Mi’n amau utna mah toh a zuih uh ut a, saltangte thagum a nna sepsak toh kibang in nungzui bawllou hi.
“Hihdam na ut hia?”
Damlou hinapi damlou ahihlam uh kitheilou, pom utlou a om uh chih Jesu’n a thei hi. Himahleh i damna ding damdawi thagum in hon nesak lou hi. Daktor thupitak himahleh hihdam utte kia damsak hi. “Mi damthei te’n daktor a kiphamoh kei ua, mi damtheiloute’n a kiphamoh zaw uh. Mi diktatte sam ding a hong pai ka hi kei a, mi khialte kisik ding a sam di’n hong pai ka hi zaw” achi hi (Lk.5:31,32).
“Hihdam na ut hia?”
Pa Pathian, Daktor liantak in hiai dotna hon bawl ka za uhi. Ka hihna diktak uh kimuthei ding in hon panpih in. Hehpihna hon pia inla, ka hong kihei ua hihdam a ka om theihna ding un hon panpih in.
Unaute zingpha. Tuni hun zatnuam chiat.