Huan, Jesu’n, a kiang uah, Hon zui un, huchi’n mihing man di’n ka hon bawl ding, a chi a (Mk.1:17).
Mihing mantu bang chi’n a hihtheih dia?
Mawlchik a Jesu’n agen tuh Amah zuih ding chih ahi.
Jesu zuih tuh mangthangte Aman a it bangbang a itpihna, lungsim kihong lianpi a hinkho zat, kipumpiakna leh Pathian thupipen a koihna hinkhua ahi hi.
Jesu tuh mangthangte zong a hondam ding in a hong pai hi. Atup leh ngim lam mah ah a kalsuan a, kross ah hong si hial hi. Mangthangte hotdam ahihtheihna ding un thil neuchik pelou in, a hinna pumpi apia hi. Hiai ding in nang leng na kipe ut sam diam?
Hiai nasep tuh kum khat a program thupitak nihvei thumvei hiam saptuam in i bawlte kia hilou in, hunteng nna, i hinkhua leh i hinsan thil ahi zaw hi. I Toupa Jesu’n bel an leng ngaihtuah manlou khop in hiai nna asem hi (cf.Jn.4:31-38). Mihing mantu i hihtheihna ding in hiai bang lungput neih a ngai hi.
Mihing mantu na hih ut taktak leh i Heutupa zui in. Na office kaina mun ah, na bazar kaina mun ah, lawmte toh na kithuahna mun ah, mi inn a na pawtna mun ah, na laisimna mun ah, na sigalna mun ah i Makaipa zui in. Huchiin midangte nidang a na muhdan hilou in, na etdan a tuam ding hi. Damloute, mi bangloute, natna neite, khebaite, mittawte, haksatna thuakte honkhetu ding in na hinkhua na pumpiak thei ding hi.
Huchiin na hinkhua nidang toh kibang ngei nawn hetlou ding hi.
Pa aw, na Tapa’ khekap zui a nang ngai a hon zongte ka zonsuah theihna ding un hon panpih in.
Unaute zingpha. Tuni hun zatnuam chiat.