Huan, angel in numeite a houpih a, a kiang uah, Nou zaw lau kei un: Jesu, a kilhden uh na zong uh chih ka thei: hiailai ah a omta kei; a gen bang ngei in a thou nawnta, a lupna mun en him un (Matt.28:5,6).
Sihna bang chi bang in i en dia? Laisiangthou in sihna bang chi’n agen a?
Laisiangthou in gendan tuamtuam a agente lak a khat tuh melma chih ahi. “Melma hihsiat a om nanungpen ding tuh sihna ahi” chi’n Paul in Korinth-te kiang ah gen hi (1 Kor.15:26 – Parallel Bible). Sihna tuh melma genhak, azawng-ahau in a suklungkim zohlouh uh melma ahi hi. I it mahmahte hon gukkhiaksak in thawmhauna, lunglenna leh lunggimna hinkhua toh hon nuse sek hi.
Aw sihna, ka lawm uh na hi het kei hi!
Himahleh Laisiangthou in sihna toh kisai thil dang leng agen om hi. Pathian tate’n sihna tuh melma kia a enlou in, sikha nasemtu (servant) bang in leng a en uhi.
Sawltak Paul in khovel lungsim nei Korinth-te tuh amah leh evangelist dangte nasemtu (servant) bang a en ding a tampi a hasot nung in, a thugen hiai bang in hon zou hi:
“Huaiziak in kuamah in mihingte suang kei uh hen; bangkim nou a ahi vekta ngal a; Paul hiam, Apollo hiam, Kifa hiam, khovel hiam, hinna hiam, sihna hiam, thil omsa hiam, thil hong om ding hiam; A vek in nou a ahi vek hi; noumau leng Khrist a na hi ua; Khrist leng Pathian a ahi” (1 Kor.3:21-23).
Bang chi dan a hiai thil hithei hi ding? Sihna in bang chi dan a Pathian’ tate hon sepsak (serve) kha ahi dia? Pathian’ tate’n i lunggulh pen vangam i tunna ding in hon sepsak (serve) a, huchiin Pathian toh omkhawm ding in hinna thak hon bawlsak hi.
Huaiziak in sihna tuh melma himahleh zohsa melma (defeated enemy) ahi zaw hi. I Toupa Jesu han akipan a thohnawn akipan sihna tuh thuneihna neilou (powerless) a bawl in a omta hi. Susetu sihna tuh suksiat in a omta a, nssemtu hong suak in, hiai melma tuh i pangkhawmpih thupipen (greatest ally) hong hi zawta hi.
Hiai melma tuh a lauhuai nawn kei a, ei hon sepsaktu dia bawl in a om zawta hi. Huaiziak in Pathian’ tate’n sihna tuh lau nawnlou in, hangsan tak in “sih leng punna ahi” ichi theita hi.
Pa aw, Jesu Khrist tungtawn a vualzohna non piak ziak in kipahthu kon gen uhi.
Unaute zingpha. Tuni hun zatnuam chiat.