Sepaih kua ahia amah kivak a galkap ngei? Kua’n ahia, a gah lah nelou a, grep huan bawl ngei? Ahihkeileh, kua’n ahia, ganhon nawitui nelou a, ganhon vul ngei? (1 Kor.9:7).
Tuni a i tangteel tuh tanchinhoih gente tanchinhoih gen a nekmuhna ding ua Toupa thupiak (9:14) ahihdan Korinth saptuam in a theihsiamna ding ua Paul in gendan tuam deuh a agenna ahi. Jesu Khrist mahmah in leng hiai bang in ana gen hi: “…nna semmi tuh a nek ding mutak ahi ngal a” (Matt.10:10); “nnasemmi tuh loh mu tak ahi” (Lk.10:7).
Sepaih galkap in loh amuh a, grape huan bawl in agah a nek a, ganhon vultu in a nawitui a nek mah bang in tanchinhoih gente a sep thaman uh a nek ding utuh Pathian deihdan ahi.
Saptuam in tanchinhoih gentute khaloh apiak tuh panpihna thilpiak (benevolence) hilou in thaman (wages) ahi hi (2 Kor.11:8). Huaiziak in thu namsente a ding a semloupi a loh lak adiklouh mah bang in a semloupi chawmna piak leh a semte chawmna piaklouh saptuamte a ding in leng diklou hi.
Sawltak Paul mah in hiai ana chi hi: “Koute’n khalam thilte na kiang ua ka tuh ngal uh leh, na salam thilte uh at mahle ung, thil kilawmlou ahi dia hia?” (1 Kor.9:11). “Huan, thuhilh a om in thil hoih tengteng ahilhpa kiang ah pe sam hen” (Gal.6:6).
Unaute zingpha. Tuni hun zatnuam chiat.