Huan Smarna khua a saptuamte angel kiang ah hichibang in gelh in: A masapen leh a nanungpen, huai si a hing nawnta in hiai thilte a gen hi (Kil.2:8)
Smarna saptuam kiang a laikhak khaktu tuh a masapen leh a nanungpen, a si a hing nawnta chih a gen in a-om a, hiai tuh Jesu Khrist genna ahi chih bung khat ah i genta hi.
Hiai tanglai Smarna khopi tuh tulai a Turkey khopi İzmir kichihna mun ahia; Ephesa khopi akipan mallam (north) kilometre 56 a gamla a om ahi. Smarna ichih Greek min ahia, Hebru ah Myrrh ahia, gimnamtui chihna ahi. Hiai Myrrh gimnamtui tuh Jesu a hong pian a mipilte’n a thilpiak uh thumte lak ah khat ahia (Matt. 2:11), a sih in leng Nicodem in a luang zutna in anei hi (Jn. 19:39). Khopi kilawmtak, long khawlna mun poimoh khat ahia; tanglai hun in “Asia Lallukhu” (the Crown of Asia) chih in a om hial hi.
Smarna khopi tuh Rome kumpi adia khopi ginom a theih in a-om a, a ginomna ziak mah un khopi zalen a puan in om hi. Huaiziak in Rome kumpi doudaltu a angaihsut uh khristiante tung ah sawina leng a uang mahmah hi. Hiai khopi ah Judate tampi a om ua, a thupai mahmah uhi. Huai Judate’n khristiante tuh a minam uh zekhemtu bang in a ngaihtuah ua, muhdah chihtak in a mudah uhi. Khristiante a sawina ziak mah un Rome solkar ah athupai mahmah uhi.
Smarna a om khristiante tuh naktak a sawi in om mahle uh a ginomna uh a khahsuah kei ua, Jesu’n demna thumal khat leng a gen kei hi. Sawina thupitak tuaktou lai ding uh ahihdan agen a, sih tanpha a ginom ding in a hasuan hi.
Unaute zingpha. Tuni hun zatnuam chiat