“Philadelphia a saptuamte angel kiang ah hichibang in gelh in: Huai siangthoupa, dikpa leh David chabi neipa, amah hon kuamah in akhak theih louh leh amah khak kuamah in ahon theih louhpa’n hiai thilte agen hi (Kil.3:7).
Philadelphia tuh Asia gam a saptuam omna khopi sagih kigente lak a khopi naupangpen ahi. Pergamum kumpipa Attalus II in a sanggampa Eumenes a itna ziak a alamkhiak khopi ahia, huaiziak in a min din Philadelphia a sa hi (PHILADELPHOS = Brotherly Love). Grik pau leh tawndan puangzaktu ding liauliau a lamkhiak khopi ahih dungzui in Grik pau in a khopi sawtlou sung in a zelsuak ngal hi. Zinling hatna kuam a om kha ahihziak niteng phial in zinling a om gige hi. Huaiziak inn hoihlou bibuuk pian khawng ah a teng tangpi uhi.
Hiai khopi a omte’n zinling in a sawi chip zohlouh ding innkip leh khuam muanhuai bang bawlkhiak theih hileh chihte a lunggulh mahmah uhi. Rome kumpite mitmuh a deihsakna a tan ziak un panpihna tampi a dong uhi.Tuni i tangteel ah i muh bang in laikhaktu Jesu’n ahihna tuamtuamte lak ah, “Siangthoupa, dikpa leh David chabi neipa, amah hon kuamah in akhak theih louh leh amah khak kuamah in ahon theih louhpa” chihte a hon zang hi. Huaiziak in en leng i Toupa Jesu hihnate theichian in Amah dungsun in hinkhua zat sawm le’ng ichi hi.
Unaute zingpha. Tuni hun zatnuam chiat