Huan angel sagih pengkul sagih tawite mut ding in ahong kisa uhi (Kil.8:6)
Pathian’ khut taklam a om laibuzial Gakkipna Sagihna a hon phel lai in Johan in Pathian ma a angel sagih dinghte kiang a pengkul sagih piak a om amuh thu i genta hi. Huai angel sagihte’n a pengkul tawite uh mut ding in hong kisa uh chih tuni i tangteel ah i mu hi.
Kilakna 8 sung ah Angel masa 4-te’n pengkul hon mutna uh i mu hi. Angel masapen in Pengkul Khatna hon mut a, huchiin gial leh mei in hon zui a, singkung seh thum suah seh khat a kangbei hi. Angel nihna in Pengkul Nihna hon mut a, huchiin tang lianpi mei a kang hileh kilawm tuipi ah paikhiak in om a, tuipi sung a om ganhing leh long (ships) seh thum suah seh khat suksiat in om hi. Angel thumna in Pengkul Thumna hon mut a, huchiin van akipan aksi lianpi hong kesuk a, lui seh thum a sush seh khat leh tuinakte tung a deng hi. Angel lina in Pengkul Lina hon mut a, huchiin Ni, Kha leh Aksite seh thum suah seh khat chiat hihmial in om uhi.
Hiaite tuh a taktak a thiltung ding hilou in, chiamtehna leh gentehna kampau ahi uhi. Pengkul tuh kigalging ding a vaulawkna ahia (1 Kor.14:8); pengkul hong kimut teng in seh thum suah seh khat zel susiak ahi chih i mu hi. Hiai tuh hihchimit a sukbeina hilou in, vaulawkna ahi chih muhtheih hi. Pengkul mutte tuh Pathian’ angelte ahi uh chih i mu a, a pengkul mut utuh angel dang khat in gimnamtui halna kuang leh maitam a mei leitung a hon paikhiaksuk akipan hong kipan ahi chih leng i mu hi. Huaiziak in hiai Pengkulte tuh Pathian’ vaulawkna ahi chih chiang hi.
Pengkul masa 4-te’n a sukkhakte (affect) uh i et leh leitung (earth), tupi (sea), luite (rivers/springs) leh vanlam thilte (heavenly bodies) hi ua, Pathian in khovel tuahsiatnate (natural calamities) zang a vauna ahi chih muhthei hi. Pathian in a misiangthoute’ thumna dawng a, Amah doutu Rome kumpi giloute natural calamities zang a vaulawkna a piakna ahi hi.
Kilakna 6 ah Gakkipna masa 4-te ah sakol tungtuang 4-te zang in gal kidouna, sum-leh-pai giautauna, hipi leh sihnate tungtawn a Rome kumpite gawt ding ahihdan a genlawkna i mu hi. Huai mah bang in hiai Pengkul 4-te’n leng khovel tuahsiatnate zang a Rome kumpite a vaulawkna ahi hi.
Kilakna maban lam i et zom zel leh Rome kumpite’n Pathian vaulawkna a ngeingaihlouh ziak un Pathian in a lalgam mahmah leng beisak takpi mah hi. Kumzabi khatna hun a Rome lalgam hattak tuh a beisa khang tangthu (history) ahita a, maban ah Rome lalgam thupitak hong dingkhe ding ahi nawn kei hi.
Aigupta kumpi Pharaoh in Pathian vaunate ngaineu in om a, kumzabi khatna hun a Rome kumpite’n leng Pathian vaunate nelhsiah uhi. En leng i hinkhua a Pathian’ vauhilhnate i ngaihneu khak ding lauhuai mahmah hi. Pathian khut hattak nuai ah kitahlut thak ni.
Unaute zingpha. Tuni hun zatnuam chiat