Huan Pergamom khua a saptuamte angel kiang ah hichibang in gelh in: Namsau hiam tak hiamtuah nei in hiai thilte a gen hi (Kil.2:12).
Pergamom khua tuh tulai a Turkey khopi Bergama kichihna mun ahia; hiai khua a saptuam kiang a laikhaktu Jesu Khrist tuh “namsau hiam tak hiamtuah nei” a gen in om hi.
Hiai khopi 133 BC in Rome kumpite ukna nuai ah piak in om a, huchiin Roman Governor (Proconsul) in hiai khopi apan vaihawmna hon nei in, Asia Minor gambup adia Rome kumpite vaihawmna munpi masapen hong suak hi (a khonung in bel Ephesa ah kisuan).
Rome kumpi nuai ah ukpipate (Governor/Proconsul) Ius Gladii nei leh neilou in kikhen uhi. Ius Gladii tuh “namsau tung a thunei” (the right of the sword) chihna ahia; hiai thuneihna neite’n Rome dan phalsakna in mite thah leh ngaihdam theihna thuneihna a nei uhi. Pergamom Governor in hiai Ius Gladii thuneihna a nei hi. Hiaiziak mah hiai khua a saptuam kiang ah laikhakna ah Jesu’n a hihna tampite lak ah “Namsau hiam tak hiamtuah nei” ahihna a hon zang hi.
Rome ukpite namsau in taksa hinna kia thatzou a; himahleh Jesu Khrist’ namsau hiamtuah, Pathian’ thu (Heb.4:12) in bel i khalam tanpha hon hingsak in sisak thei hi.
Unaute zingpha. Tuni hun zatnuam chiat