Huan, lampi a apai kawm un tui bang hiam a tung ua, mi chilgeh in, “En dih, hiai ah tui a om, baptisma tanna ding bang in hon dal khol a ahia?” achi hi (Nas.8:36).
- Jesu thu i gen leh (preaching Jesus) baptisma thu leng gentel a ngai hi. Philip in mi chilgeh kiang ah Jesu thu agen chih imu hi (8:35). Baptisma thu gentel ahi ngei ding a, mi chilgeh in baptisma tan hon sawm thei hi.
- Baptisma tanna ding in tui a poimoh hi. Hiai ah tui a om, baptisma tanna ding bang in hon dal a ahia? chi’n mi chilgeh in Philip a dong hi. Khenkhatte’n puansan nuai peuh a baptisma a tansak uh a diklouh dan hon musak hi.
- Baptisma tuh phumthoh a tan angai hi. Philip leh mi chilgeh tuh baptisma tang ding in tui a ahohkhawm suk uh chih i mu hi (8:38). Takthoh hiam a tansak theih hileh a sakol kangtalai uh kholsak sese lou in a tung ah tang thei mai ding uhi. Himahleh tuisung mahmah a lut a tan ngai ahihziak in a nih un tui ah a hohsuk tuak uhi.
- Baptisma tanna ding in lungtang tengteng a gintak a poimoh hi. Mi chilgeh in baptisma tang a ut in, Philip in na lungtang tengteng a na gintak leh ahi thei achi a, huchiin Jesu Khrist tuh Pathian Tapa ahi chih ka gingta, achi hi. Jesu Khrist Pathian’ Tapa ahi chih gingtalou a baptisma tan tuh a dik kei hi. UPC te’n khelh ngaihdamna ding in baptisma tang kichi mahle uh Jesu Khrist Pathian’ Tapa ahi chih a gintaklouh ziak un a baptisma tan uh a dik tuan kei hi.
Unaute zingpha. Tuni hun zatnuam chiat.