Huchi’n Setan in TOUPA a dawng a, ‘Bangmah lou dia Job in Pathian kihta ahi maw?’ (Job 1:9)
Mihing ten i nopsak hun sang in i haksat hun in Pathian kiphawk a, a panpihna kingen tangpi bang hi. Himahleh a taktak in i haksak hun sang in nuam i sak hun, i deihdan a thil a pai hun in Pathian thupina piak a hihthupi awlsam zaw tham hi.
April-May, 2021 in Covid-19 ziak in ka nupa un sihsual in ka dam kei uhi. Hiai ka damlouhna un taksa leh khalam ah ka thil etdan leh muhdan hunkhop a hon khek hi. Huai hun akipan tuni tan lungsim a hong lang point bangzah hiam en in; huaite akipan hun haksa a leng Pathian hihthupi ding in kizil le’ng ichi hi.
Pathian in mi kisiate a zang
(God uses broken people)
Mipil, mi thupi, neih-leh-lam kiningching leh khristian inkuan hoihtak nei hi in, Pathian’ nna sem in Amah aa ding in kizang lehang i tawldam in midangte a ding in leng etton taak kihi ding hi. Laisiangthou ah mi hausa leh thupi Pathian lau, Amah adia kizang muh ding hun khop om hi.
Himahleh khovel a khosa lai ihihman in hiai tuh miteng tan hilou a, huaiziak in Pathian in ana mi zat tampite tuabang mite ana hi gige lou hi. Mi lungngai, mi khasia, mi mawl leh poihlong tampi ana om hi. Kumpi David en lehang insung buaitak nei, tate thunun zoulou, lungkhamna toh kidim Israelte kumpi ahi hi. Himahleh Pathian ngai ngoihngoih a beel mi ahihziak in Pathian mizat thupi suak hi. Mosi mi dangawk leh kamsiamlou himahleh Pathian in a nam teel Israelte Aigupta gam akipan pikhetu ding in ana zang hi. Numei kizuak Rahab, leh pasal suun a lungngai Ruth tuh i Toupa Jesus Khrist khanggui ah genphak in a om uhi. Elijah tuh mahni kithat ut khop a kingaisia a genthei kisa mi ahi; himahleh Pathian zawlnei thupitak ahia, sihna chiamlou a van a laktouh a om mi nihte lak a khat ahi. Pathian in ka mi diktat chia a kisaktheihpih mahmah Job tuh a neih leh lam, a tate teng suun a lungkhamna thuak, sihsual a damlou mi ahi. Joseph tuh a pianpih sanggamte ngoihngoih in a zuau san uh, diklou tak a ngoh a om a, gentheihna thuak mi ahi. Jesu nungzui Peter, Jakob leh Johan-te tuh nekzonna niamtak, ngasa man a kivak mite ahi uhi. Sawltak Paul tuh a damtheilou taksa natna nei mi ahi hi.
Laisiangthou ah Pathian mizat tamtak haksatna thuak gen ding tampi om lai hi. Amau ten a haksat hun un Pathian nuaksan in, khasia kisa in a gense kei ua, ana beel tuntun zaw uhi. Huaiziak in a haksatnate uh, Pathian kiang a a kahna late uh, Pathian panpihna a ngetnate uleh a hinkhua ua gentheihna a tuahte uh tuni a gingtute a ding in kihanthawnna in a pang thei hi.
Lungkhamna in hunbi neilou hi
(Grief has no timeline)
Lungkhamna leh haksatnate chiklai peuh in miteng in kituak thei gige hi. Khenkhat a pawsiam deuh bang, khenkhat a pawsiamlou deuh bang, khenkhat hun sawt a dam bang, khenkhat a hun sawt a leng mangngilh theihlouh bang om ding hi. Sihna-manna, gentheihna leh haksatna i tuah hun chiang in a bul tung in mi’n hon awlmoh chiat mahleh, kuaman i haksatna leh gentheihnate za ut gige lou hi. Huaiziak in haksatna thuak tamtak in hinkhua tuh angeina bang in zattouh sawm mahle uh a lungsim guk uh thawmhauna bei tuanlou hi.
Haksatna ituah hun in a bultuung in mi’n hon awlmoh souhsouh ua, a thuak nuam deuh in thawmhauna leng a dan om deuh hi. Himahleh ni bangzah hiam a hong pai a, midang ten mangngilh in om mahle uh a thuaktute thawmhauna bel bei tuan lou chih om thei hi. Amau thuak bang thuaklou ten hunta achihpih hang un a thuaktute a ding in bel damsung leng daih thei hi.
Hiai bang ngaihtuahna om theite kitheihsiam pihna ding in a thuaktute dinmun a kikoih theih ngai a, adinmun ana tawnkha ngeite mah in theisiam uhi.
Pathian deihdan ahi
(God’s will)
Khovel a thil tung teng leh mihing ten i hinkhua ua i thiltuah teng uh Pathian theihlouh khat leng omlou hi. Himahleh Pathian deihdan hi veklou hi. Huaiziak in i hinkhua a haksatna leh lungkhamna ituahte leng Pathian deihdan leh hoihsak hi vek samlou hi. Pathian in michih deihteel theihna (free will) hon pe chiat a, michih in i deihteelna ziak a agah (consequences), a hoih hi in a sia hitaleh, i loh ding hon phalsak hi. Etsakna ding in, Pathian thupiak ka zuih utlouh ziak a tual ka thah aleh ka tualthat man agah ka loh ding om a, huai gentheihna pen ka sepgah ahi hi. Pathian in huai haksatna pen amah lam ka naih theihna ding in zang thei mahleh, tual ka thah a, huai gentheihna ka tuah ding pen Pathian lemgel leh deihdan hipahlou hi. Huaiziak in hun tamtak ah haksatna leh lungkhamna i tuahte i deihteelna i zatkhelh ziak a i tuah hi ut mahmah hi.
Himahleh haksatna leh lungkhamna khenkhat bel Pathian in amah lam i naih theihna dia hon sawina om thei tham hi. Hebru laikhak gelhtu in “Toupa’n a itte sawi nak a, ta a kipahpih tuh a vo nak hi” (Heb.12:6) chi hi.
Hin Khrist ahia, sih leng punna ahi
(To live is Christ, to die is gain)
Sawltak Paul in, “Kei a di’n zaw hin Khrist ahi a, huan sih leng punna ahi” (Phil.1:21) ana chi hi. Khovel i khualzinna ahia, khristiante tuh i lamet vangam zuan a niteng a pai ihi hi. Sa leh sisan toh vangam kitung theilou ahihman in, vangam i tunna ding in taksa sihna poimoh hi. Huaiziak in khristiante a ding in taksa sihna tuh manna hilou in punna hi takpi hi.
Sawltak Paul in, “Himahleh nou ziak in sa a om phot tuh a kiphamoh zaw hi” (Phil.1:24) achih bang in khristian tampi ten ta-leh-naute awlmohna ziak bang, Pathian’ lalgam nasepna awlmohna ziak bang leh thil khenkhat ziak in sihna kiteel masa lou hi. Huaiziak in damlouhna i neih chiang in doctorte ki-ensak in damna ding in damdawi ne in hihtheihtawp in kipang sek hi. Hiai tuh khamit louhna leh Pathian thu awi louhna hipah lou hi.
Sihna i tuah hun chiang a Khrist kiang tung dia kimansa a om a, tomchik i dam sung a Amah adia khosak tuh tup pen a neih gige poimoh hi.
Thukhitna
I tangteel a Setan in Pathian a dawnna ngaihtuah tham mahmah hi. Hiai mah tuh tuni tan Pathian mite hon khemna hi lailai hi. Huaiziak in hamphatna i tan a nuam isak hun kia hilou in, haksat hun a leng Pathian hihthupi gige thei ding in Pathian in hatna hon pe chiat hen.+++