Huaiziak in, thil bangkim mi’n na tung ua a hih ua na deih ding bang uh, mi tung ah leng hih sam un; huai tuh dan thu leh zawlneite thu ahi him ahi (Matt.7:12).
Laisiangthou ah Golden Rule chih thumal kimu kei mahleh Laisiangthou lettute’n tuni a i tangteel tuh Golden Rule ana chi uhi.
Midangte’n i tung a thilhoih a hih ding uh kideih chiat mahleh midangte tung ah en kihih utlou chiat hi. Jesu’n mihingte lungsim leh i angmasial dan uh a thei mahmah a, hiai thu agenma chet ah migilou (evil) ihi ahon chi a (Matt.7:11); huai i gitlouhna gamtat i kiventheihna ding in, “mi’n na tung ua a hih ua na deih ding bang uh, mi tung ah leng hih sam un” chi’n hon gen hi.
Miteng in phu (deserve) kei mah lehang midangte zahtak, itna leh pahtakna kideih chiat hi. Hiai i lungsim put mah omdan hoih chiinna ding in hon gen hi. Midangte zahtak i ut leh en leng midangte zahtak a, midangte it i ut leh en leng midangte it a, midangte pahtak i ut leh en leng mi pahtak ding chihna ahi hi. I tung a midangte hoih ding i deih leh ei leng midangte tung ah hoih ngai hi.
Hiai Jesu Khrist thugen miteng in kizui thei leh khovel nuam tuan mahmah ding hi. Pathian’ thutak zui, khristiante bek in hiai zuih sawm in panla thakthak ni.
Unaute zingpha. Tuni hun zatnuam chiat.