Himahleh, nou bang chi na sa ua? Mi kuahiam in tapa nih a nei a, Khatpa kiang ah a va hoh a, Ta aw, tuni’n grep huan ah va sem ve, a chi a. Ama’n, Ka utkei, a chi a, a dawng a; himahleh a den chiang in a lungsim a kheng a, a kuanta a. Huan, khatpa kiang ah leng a va hoh a, tua bangmah in a va chi a. Huan, ama’n, Pu, ka kuan ding, a chi a, a dawng a; himahleh a kuanta kei. Huai mi nihte a kua zaw in, a pa uh deihlam a hih aleh a chi a. Amau tuh, A masapen in, a chi ua. Jesu’n a kiang uah, chihtaktakin k’on hilh ahi, siahkhonte leh kizuak te’n Pathian gam ah nou a hon lut khelh ding uh. Johan tuh diktatna lamtawn in na kiang uah a hong a, amah lah na gingta ngal kei ua: siahkhonmite leh kizuak te’n bel amah a gingta ua; nou te’n huai na muh nung un leng amah na gintak theihna ding un na kisik nuam tuan kei uh (Matt.21:28-32).
Mihingte’n kam a thu hoih taktak gen hinapi in a taktak a sepkhiak haksa kisa sek hi. Taksa damtheihna ding a nek leh tak kidaam, exercise hoih taktak a lak a ki-fit tak a om chihte hoihsa in kam in leng ka gen kha sek hi. Himahleh a taktak a sepsuah in ki-fit tak in ka om zou kei hi. Ngaihdan hoih taktak genkhiak thil hoihlua hinapi in, a taktak a i sepsuah keileh a manphatna om tuanlou hi.
Hoihtak a ngaihtuah in hiaite khalam ah bultuah sawm mah dih. Pathian deihdante zuihthoh ihi hia ahihkeileh kam kia a gen a genthoh? Pathian in i kam kia a genthoh hilou a zuihthoh ding in hon lamen hi. I Toupa Jesu’n, “Toupa, Toupa, hon chi na peuh van gam ah a lut kei ding uh; ka Pa van a om deihlam *hihte* tuh a lut ding uh” achi hi (Matt.7:21).
Pathian deihdan pen taksa thilte (diet, exercise, adangdangte) bang in ngainep theih vuallouh hi. Kam kia a genthoh hilou in, thu zuite hih sawm chiat ni (Jak.1:22).
Pa aw, kam a ka gente uh semkhe zou zel din hon panpih in. Thu zate kia hilou a, a zuitute hi zaw thei din hon panpih in.
Unaute zingpha. Tuni hun zatnuam chiat.