Hiai ah pilna a-om hi. Kuapeuh theihsiamna nei in, gamsa nambat sutkhia hen; huai lah mihing nambat ahi ngal a; huan ama nambat tuh zaguk sawmguk-le-guk ahi (Kil.13:18)
Nambat 666 ichih bang genna ahi dia chih toh kisai ah Laisiangthou suuttu tampite ngaihdan kibanglou hi. Laisiangthou thu toh kisai a akitheikhial nak mahmah; mi tuamtuam leh thil tuamtuam kawksak a om nambat kisuut tampen chih theih ding hi.
Cryptic method, laimal leh nambat bulhtuah a gawmkhawm in mi tuamtuam Nero Caesar, Catholic Pope, Napoleon, Mussolini, Hitler, Saddam Hussein, Latin vaihawmtu masa Latinus, ahihkeileh khovel kisumdawn tuahna tuamtuamte (international trade system) nambat 666 phaksak in a om uhi. Catholic scholarte’n hiai dan mah zang in Martin Luther leh John Calvin chihte 666 a phasak leuleu uhi. Hiai dan in min tuamtuam leh thil tuamtuam 666 phaksak theih tam mahmah hi. Hiai dan a diksak teiteina in bangmah diksaklou zaw hi (What proves too much proves nothing).
Nambat 666 pen ataktak (literal) a la ding hile hang gamsa kigente leng gamsa taktak ahih ngai ding a, Kilakna laibu a kigen nambat tuamtuam 144,000 leh adangdangte leng ataktak mah a lak vek ngai ding hi. Huaiziak in hiai dan a 666 literal a phaksak teitei tupna pen a dik theihlouhna tampi om hi.Kilakna 13 a gamsa nih kigente khovel mipite apan hong piangkhia Rome lalgam (Kumpite) leh Rome kumpite apan hong piangkhia sahkho diklou leh kumpite biakna ahi chih i genta hi. Mi tengteng, aneu leh alian, azawng ahau, sikha leh sikha loute tuh akhut taklam uhiam atal uh hiam ah gamsa chiamtehna piak in a-om uhi. Gamsa chiamtehna neiloute’n lei thei lou leh zuak thei lou in a om uh chih i mu hi (13:16-17).
Hiai gamsa chiamtehna tuh a taktak a muhtheih dia a khut hiam tal hiam a chiamtehna gen hilou hi. Gentehna kampau ahia, taksa leh lungsim a Rome kumpite leh a sahkhua ua kitahlutna genna ahi hi.
Khovel khangthu a i muh bang in Kilakna gelh hunlai vaihawm Rome kumpite’n a gamsung kipumkhat sak a tupna ziak un a gammite (citizen) amau adia ginom tak a a-om ua, “toupa” chia a sap ding uh a ngiat uhi. Huaiziak in gamsung adia a ginomna uleh ginomlouhna uh chetna ding in hiai kumpite biakna tuh khristiante tung ah thagum a zat in a om hi. A be utloute nek-leh-tak zonna, sum-leh-pai zonna leh khotaang vai ah etkhiak in om uhi.
Tuni i tangteel ah gamsa nambat tuh 666 ahihdan i mu a; huai tuh mihing nambat ahi, achi hi. Hiai nambat tuh Kilakna laibu simtu masapente a ding in theih haksa hetlou ding hi. Judate’n nambat tuh chiamtehna genna ding in zang ua; nambat sagih tuh abukim leh abuching (completeness/ perfection) genna ding in azang uhi. Huaiziak in nambat sagih tuh Pathian, Pathian’ mite leh abuching genna ding in Kilakna laibu ah akizang hi (1:4, 12, 16, 20; 2:1; 3:1; 4:5; 5:1, 6 etc.). Nambat guk tuh nambat sagih ching zoulou ahihman in abuchinglou (imperfect and incomplete) genna ding in a zang uhi.Pathian’ sianthouna phakzohvual ahihlouh dan genna ding in “Siangthou, Siangthou, Siangthou” chih zat in om a (4:8; Is.6:3), Pathian’ thukhenna ziak a tunggikna uangsem (intensified) ding genna in “Tunggik, tunggik, tunggik” chih thumvei zat zom in om hi (8:13). Huchimah bang in Setan vanzat Rome kumpite leh a sahkhua utuh Pathian lamkhiak lalgam toh i teh chiang in teh theih vuallouh in bukimlou hi. Huaiziak in a bukimlou ahihdan naktak a genna in nambat bukimlou guk thumvei zat in hong om hi. Lohsapna tung a lohsapna tung a lohsapna chih theih hi.
Bangziak a Setan leh a nungzuite Pathian (bukimna) genna dia kizang nambat 7 nuai chet nambat piak hi ding in na ngaihtuah a? Pathian in Setan thuneihna ngaineu khengval (underestimate) ding in hon deihlou hi (1 Pet.5:8). Khen chiang in gitlouhna in thil hoih nuaisiah a bat hun a om sek hi (Dan.7:19-21). Himahleh Pathian leh Amah ginomtak a zuite’n a tawpna ah vualzohna nei gige uhi (Dan.7:22). 666 tuh mihing nambat ahi achihmah bang in leitung mihingte bangchituk in thupi in bawlthei kisa mah le hang Pathian mai ah bangmah kihilou hi (Is.40:22-24). Khenchiang in Setan hatlua a bat hun om mahleh a nambat in Pathian nambat pha zoulou ahihman in Pathian dou vual hi ngeingeilou ding hi.
Pathian sang a Rome kumpite teelzawte mah bang a tuni a Pathian sang a khovel thil telzawte’n “Pathian thangpaihna uain leh nou a dawn” ding uhi (Kil.14:9-11). Himahleh “Belamnou’ sisan a apuan uh sawp a, hihngoute… Pathian’ laltutphah ma a om in… Belamnou a belamchingpa uh a hih ding ziak in… amaute hinna tuikhuk ah pi ding a; Pathian in amit ua kipan khitui anulhul ding hi” (Kil.7:14-17). Tuni’n nang kua’ chiamtehna na nei a?
Unaute nitakpha. Mangpha leh ihmut lim chiat.