Huan, huai lai a, nungzuite a pun a pun lai un, a niteng thil hawm uah amau meithaite a limsaklouh nak ziak un Hebrute tung ah Grik-Judate a phunta uhi (Nas.6:1).
Khristiante neih leh lam kikop a nuamsa tak a om khawm himahle uh pau leh ham ziak a kideidanna hon neipah uhi. Grik Judate tuh Juda mi, Palestine gam polam a teng leh khosa, Grik pau leh tawndan ana zui Judate ahi uhi. Juda mi himahle uh paudan leh tawndan tuam deuh ahihziak uleng ahi kha ding a, a meithaite uh nelhsiah a hong om ziak in phunna hon nei uhi. Mihing lungsim ah hiai bang a chi leh nam, pau leh ham ban, beh leh phung a kideidanna om baih mahmah hi. Himahleh makaite’n hiai bang lungsim neih louh teitei tuh Pathian deihdan ana hi zaw hi.
Khrist saptuam tuh nam tuamtuam, pau tuamtuam leh beh-leh-phung tuamtuamte omkhawmna dia Jesu’n a lamkhiak ahi. Saptuam sung a pau tuam deuh ana zang, a tawm zaw deuhte’n leng angtang tak a aki-inteksak theih uh poimoh mahmah hi.
Phun nawina om mah leh sawltakte’n pan honla in, Kha leh pilna a dim mi sagih hon telkhia ua, huchiin hiai buaina in ma sawnlou a sukveng in om pah hi. Nelhsiah kisak ziak a phunna, lungkim louhna leh kilang khenna saptuam sung a om hi a i theih ngeingei leh makaite’n ngaikhawk tak a sukdam pahpah tuh saptuam chidamna ding in a poimoh hi. Huai ding in Kha leh pilna a dim mi i kitasam khanak sek hi.
Pa aw, na saptuam sung ah Kha leh pilna a dim mite ka kitasam kha sek uhi. Tua bang mite hi chiat thei din hon panpih in.
Unaute zingpha. Tuni hun zatnuam chiat.