Bangkim ka hih peuhmah na chiin ding ua ka hih ahi, huchibang a sem gim leh, Toupa Jesu thu theigige kawm in mi hatloute na panpih ding uh ahi; amah mah in, Bangkhat lak sa’ng in, piak in lukhawng a nei zaw, a chih, a chi a (Nas.20:35).
Bang in ni hoih (good day) a om sak a
Tamtak in i lunglut leh nuam i sakte’n ni hoih om sak ahi i chi ding hi. Deihdeih lei dia bazar kai, i lunglut lam game tuamtuam kimawl, movie nuam i sakte et, laibu i lunglutte sim ahihkeileh music i zaknopte ngaih chihte’n i ni (day) manpha sak ahi chih ngaihdan khenkhat in i nei ding hi.
Khenkhat leuleu in damloute veh, mi bangloute panpih, khalam haksatna neite hanthawn, tagah-meithaite panpih leh inn a nna tuamtuam sep ding omte sep in i ni manpha sak ahi chih ngaihdan i nei ding hi.
Jesu ngei leng social mi mahmah a bang hi. Kitenna munte ah hoh in (Jn.2:1,2); ankuang luinate leh nekkhawmna bawlnate ah a tel zel hi (Lk.5:29; 7:36; 14:1). I lunglut leh nuam i sak i hihte, social mitnate a diklou hipah lou hi.
Himahleh tuni i tangteel a Jesu’n, “Bangkhat lak sa’ng in, piak in lukhawng a nei zaw” a chih mah bang in ei lunglutna leh nuam i sakte i hih sang in, midangte panpihtu hi dia nasepte’n i Toupa Jesu kipaksak zaw ding hi.
A tung a ngaihdan nih omthei i gelhte khenlou a, i lunglut leh nuam i sakte hihkawm a leng midangte panpihtu, midangte adia vualzawlna hi thei ihi chih ngaihtuah thak ni (Lk.14:12-14).
Unaute zingpha. Tuni hun zatnuam chiat.