Huan angel sagihna in apengkul amut a; van ah aw thupitak in, “Khovel lalgam tuh i Toupa leh a Khrist a ahong hita hi; ama’n tangtawn in vai ahawm ding,” achi uhi (Kil.11:15)
Kilakna 4 ah Pathian a thupina teng toh laltutphah a tu in thilsiamte tengteng tung ah vaihawm ahihdan i mu a; sawina tuak saptuamte’ kiang ah Satan leh a kaihzatamte’ sang a lauhuaizaw leh thupizaw vaihawmtu om ahihdan hon musak.
Kilakna 5 ah Pathian’ khut taklam a laibuzial Gakkipna Sagih a kingak, mihingte dinmun ding leh a tunung hun ding uh kigelhna i mu a; thah a om a hingnawn Belamnou (Jesu Khrist) in huai Gakkipnate phel ding ahihdan i mu hi.
Kilakna 6 ah gakkipna masa 4-te phelphiak in om a, Pathian in leitung mihingte’ kivaihawmna gilou leh huham beisak ding ahihdan vaulawkna in kidounate, nektak zonna a haksatna, giautauna, hipi leh sihnate in omsak ding ahihdan muh in om hi. Gakkipna Ngana hon ahih in Martyr a na sitate’ khate’n “ka sisan phu uh la ding a bangtan ngak lai ding na hia?” chih dotna a bawlna uh i mu hi. Gakkipna Gukna ah Pathian in a gilou Rome lalgam subei ding ahihdan a theisak hi.
Kilakna 7 ah Pathian in a thangpaihna sunbuak ma in a mi 144,000-te chiamtehna bawl masa ahihdan i mu hi.
Kilakna 8 ah Gakkipna Sagihna phel hong hi a; huchiin Pathian vauna Angel Sagihte’n pengkul khat chiat a tawite uh Pengkul Sagihte lak a Pengkul masa 4-te abanban a mut in hong om hi.
Kilakna 9 ah Angel Ngana in Pengkul 5-na hon mut a; mi giloute’n a thil gilou hih gah uh a tung ua lehbut a om ahihdan vaulawkna i mu hi. Angel Gukna in Pengkul Gukna hon mut a, Rome gamgi gal a om nam tuamtuamte apan dou a omna tungtawn in a gilou kumpite vauna piak in a om uhi.
Kilakna 10 ah Pathian’ angel hat hong kilang in a khut ah laibu neu a tawi a, angel in Pathian mite humbit a om ding ahihdan uh leh a gilou namte’ tung a Pathian vaihawmna sunbuak ding pen “zekai sak hi nawnlou ding” ahihdan a gen hi. Hiai laibu neu ah thu zaknophuai leh zaknophuailou tuang ahihdan leh Theihpihtu Nihte Kilakna 11 bullam ah i genta hi.
Tuni i tangteel ah laibuzial Gakkipna Sagihna phel a hong hih a, Angel Sagihna in Pengkul Sagihna hon mutna i mu hi. Huchiin Upa 24 laltutphah tung a Pathian ma a tute’n amai ua lei si in Pathian a hon bia ua, Khrist in vaihawmta ahihdan hon gen uhi. Khovel kumpi giloute’n Khrist’ lalgam hih chimit nak sang in a lalgam tuh leitung tengteng ah hihkip in a hong omta hi. Toupa’ Saptuam sawitute tung ah Pathian thangpaihna sunbuak in omta hi. Maban ah a chiangzaw sem a latsak in hong omtou lai ding hi.
Unaute zingpha. Tuni hun zatnuam chiat