Van ah chiamtehna thupi leh lamdangtak; numei khat ni a kizem, akhenuai a khapi sikden leh alutung a lallukhu aksi sawm-le-nih khu hong kimu hi. Ama’n nau apai a, nauvei leh suakkhe ding natna in akapkhia hi (Kil.12:1).
Kilakna laibu khenpi nih in khentheih a, bung 11 tan ah khenpi khatna bei a, khenpi nihna pen bung 12 ah hong kipan. Khenpi khatna tan ah leng a vualzou ding chiangtak in genlat hita a, khenpi nihna ah a thusim omdante a chiangzaw sem in hong kigenthak hi (Scenes are repeated to give additional information that explain why a certain result is reached).
Drama en dan in kingaihtuah le hang, bung 12 kipatna ah simtute muhtheih ding in a puankhai (curtain) hong kihong in Johan in Rome lalgam sung a sawina tuamtuam thuak khristiante muhtheih ding in “behind the scene” (puankhai nung lam) a thiltungte hon lak hi. Leitung a thiltungte tuh a taktak in “behind the scene” a Pathian leh Setan kidouna thu ahihdan muhtheih in hong om hi.
Tuni i tangteel ah numei, ni a kizem tuh nau paai, nauvei leh suakkhe ding natna a kap i mu hi. Aban i sim leh Dragon tuh huai numei ma a ding in nau aneih chiang a anau tuh nekzoh vek tum in a om hi. Numei in nam teng tung a sik chianga vaihawmtu ding tapa hon nei khia a, a tapa tuh Jesu Khrist ahi chih i mu thei hi (12:5 cf Sam.2:7-9; Nas.13:33; Heb.1:5). Dragon tuh Setan ahi chih chiangtak in hon gen a (12:9), huchiin sawina thuak khristiante muh theih ding in Satan in a chiil a pat Khrist zoh sawm a apanlaknate lohsam ahi chih a hon lak hi. Setan tuh Khrist tung a vuallel ahihman in Khrist nungzuite lam hong nga in, a sepaihte tuh Khrist nungzui saptuam mite kidoupih ding in a sawlkhia hi. Hiai kidounate tuh Kilakna 13 apat hong kilang ding hi.
Unaute zingpha. Tuni hun zatnuam chiat