Huan atheihpihna nasep uh azoh chiang un, kokhuk taw nei lou a kipan a hong pawtkhia huai gamsa in amau akidoupih ding a, amau azou dia, athat ding hi (Kil.11:7)
Theihpihtu nihte tuh misiangthoute, saptuamte ahi chih i genta hi. Jesu’n a thohnawn nung in a nungzuite kiang khovel teng a pai a, thilsiam teng kiang a Tanchinhoih gen ding in thu apia hi (Mk.16:15). A thohnawn nung kum 30 vel sung in Tanchinhoih tuh khovel teng (Kol.1:6) leh thilsiam teng (Kol.1:23) kiang ah saptuamte kiang ah tangkoupih in a om khinta hi. Theihpihtu nihte thu gente tuh Pathian akipan ahihdan thillamdangte zang a sukkip (confirm) in a om khinta hi (Mk.16:20).
Tuni i tangteel in theihpihtu nihte’n a nasepte uh a zoh chiang un kokhuk taw neilou apan hong pawt gamsa in amaute kidoupih ding a, a that ding chih a hon hilh hi. Himahleh ni thum-leh-akim nung in Pathian in a hih hing nawn chih i mu hi (11:11).
Gamsa tuh Rome lalgam chiamtehna kampau ahi chih a chiangzaw sem in Kilakna 13 ah muhtheih hi. Rome kumpite’n misiangthoute kidoupih in, Pathian’ saptuam pen nuaimang sipsip bang in kingaihsun in kipak mahmah uhi. Himahleh Pathian’ lalgam tuh Setan thuneihna toh suchimit zoh in omlou hi (Heb.12:28; Dan.2:44). Khovel in Pathian’ mite hihchimit a kisak lai un Pathian mite’ pen vualzou in van ah pitouh in om ua, a taksa uh hihlum mahle uh a khate un vualzou in vaihawm uhi.
Unaute sunpha. Tuni hun zatnuam chiat