Angel ngana in pengkul amut a, van a kipan leitung a aksi kia ka mu a; amah kiang ah kokhuk taw neilou honna chabi piak in a-om hi (Kil.9:1)
Angel Sagihte lak a Ngana in Pengkul hong mut tak in van akipan leitung ah aksi khat a hong kia hi. Huai aksi kiang ah kokhuk taw neilou tahbi piak in om hi. Aman kokhuk ahong a, huchiin meikhu a hong pawt a, huai meikhu akipan khaupete leitung ah a hong om uhi.
Tuni i tangteel a kigen van apan aksi hong kia, kokhuk taw neilou leh khaupete tuh a taktak hilou in chiamtehna leh gentehna kampau ngen ahi uhi. Kilakna laibu ah kokhuk taw neilou tuh Pathian kalh leh gilou hon omkhawmte khum bichilhna mun genna ding in kizang hi (11:7; 17:8; 20:1-3). Hiai kokhuk tawi neilou takbi tawi aksi chia gen a om tuh Setan ahihdan theihtheih hi.Kokhuk taw neilou hon a omtak in meikhu thupitak a hong pawt a, huai in ni leh huihkhua a hihmial chih i mu hi. Hiai in Setan’ thuzohna ziak a Rome lalgam sung leh khotang siatna hon lak a, khovel mite’n thutak a muhtheihlouhna ding ua Setan in a khalam mit uh delsak ahihdan hon lak hi (Rom.1:18-32; 2 Kor.4:3-4).
Meikhu akipan khaupe hong pawtte leng a pianzia uleh a nasep dingte uh i et leh chiamtehna leh gentehna ahi chih muh haksalou hi. Hiai khaupete’n tuh Pathian’ chiamtehna neilou mihingte tung kia ah siatna tun ding uh chih i mu hi (9:4). Mawltak a gen in gilou in a giloute mah a soisakna, ahihkeileh migiloute’n a thil gilou hihman uh a tung ua kilehbut nawn genna ahi hi. Hichibang mite’n tuh a thilhih gah uh hon loh hun chiang un sihna teel ding ua, himahleh silou ding uhi (9:6). Khelhna ziak a kipahna in sawt daihlou a (Heb.11:25), a gu min a thuak chiang un gentheihna naktak tun zaw a, tangtawn a khalam sihna tanpha tun thei hi (Rom.6:23).
I gentaksa mah bang in Rome lalgam hattak tuh khovel tuahsiatna tuamtuamte’n (natural calamities) hon nawk ban ah, a gam sung kivaihawmna leh a khotang mahmah leng siatgawpnate (internal rottenness) ziak in awlawl in hong niamkiak hiaihiai hi. Hiai tuh a misiangthoute’ thumna ziak a Pathian phubalakna ahi hi.
Unaute zingpha. Tuni hun zatnuam chiat