Huan angel gukna in amut a, Pathian ma a om dangka-eng maitam kii a kipan in aw ka za a; huai aw in angel gukna pengkul nei kiang ah, “Euphrates luipi lianpi a angel li hen a omte phel in,” achi hi (Kil.9:13-14).
Pengkul Sagihte lak ah Pengkul Ngana-te mut ahita a, Pengkul Ngana mut zoh ahih in tunggikna masapen bei a, himahleh tunggikna nih hong om lai ding ahihdan i mu hi (9:12).
Tuni i tangteel ah Pengkul Gukna mut ahia, huchiin maitam ki-lite a kipan aw khat hong suakkhia in, “Euphrates luipi lianpi a angel li hen a omte phel in,” achi hi. Huchiin leitung a teng mite seh thum suah seh khat hihlum ding in angel lite khahkhiak in a om uhi. Huai tak in sepaih maktaduai za nih, sakol leh a tung a tuangte hong suakkhia uhi. Huai sakolte tuh a lu uh humpinelkai lu abang a, a kam ua kipan in mei, meikhu leh kaat (brimstone) a pawtkhia a, hiaite’n leitung mihing seh thum a suah seh khat a that uhi.
Euphrates luipi tuh Rome lalgam suahlam gamgi, a melma lauhuai mahmah uh khat Parthai namte toh kikal a om ahi hi. Thukhun Lui hun ah Euphrates luipi tuh khovel lalgam hat Assyria, Babylon leh Persia-te’n namdangte suse dia adouna mun uh ahi hi (2 Kum.23:29; Is.7:20; 8:7; Jer.46:2; Ezra 4:10-11). Huaiziak in hiai Euphrates luipi tuh chiamtehna leh gentehna kampau ahia, Rome gamgi gal a kipan hong suak ding melmate agenna ahi hi.
Khovel khangthu ah Rome-te leh Partha namte kidounate hun khop muh ding om a, Rome khangthu gelhtu (historian) Edward Gibbon in Rome lalgam puksiatna ziak agen khat tuh gamgi gal a kipan a dounate ahi, achi hi.
Euphrates luipi lianpi a angel li hen a omte khahkhiak ahihtak un sepaih maktaduai za nih muh in a om hi. Mi tamtakte’n hiaite tuh tunung chiang a Armageddon kidouna om ding, huai a tel ding sepaihte ahi, achi uhi. Hiaite a taktak (literal) a la ding hi le hang Armageddon kidouna om ding achihna mun uh Jezreel phaizang ah sepaih hiai zah tatzohna ding mun omlou hi. Huaiziak in hiai tuh chiamtehna leh gentehna kampau mah ahi zaw hi.
Sakol tungtuangte’n leitung mihingte seh thum a suah seh khat a that uh chih i mu a, hiai in sukchimitna hilou in vaulawkna mah ahi lai chih hon musak hi. Pengkul Ngana a khaupete’n aikam bang in meigu nei ua (9:10); Pathian’ chiamtehna neiloute hihgentheih ding, himahleh that lou ding a thuneihna piak hi uhi (9:5). Pengkul Gukna a sakolte’n bel gulpi mei (tail) toh kibang mei nei ua, leitung mihing seh thum a suah seh khat a that uhi. Hiaite i et leh Pathian vaulawknate leng thupitou deuhdeuh ahihdan muh theih hi. Himahleh hiai Pathian’ vaunate pen Rome mipite’n ngeingaih hetlou ahihdan maban i sim leh muh theih hi.
En leng tuni a Pathian’ vaunate ngeingaihlou a i om khak ding lauhuai mahmah hi. I gam dinmun leh i khotang hinkhua khawng i et chiang in manthatna lam manoh a pai mah kibang hi. Huaiziak in Nineveh mite mah bang a Pathian thangpaihna pumpelh thei ding in i khalam dinmunte uh enthak chiat ni.
Unaute sunpha. Tuni hun zatnuam chiat