Gakkipna sagihna aphel lai in dakkal kimkhat sung van adai sipsip hi. Huchi in Pathian ma a angel sagih dinghte ka mu a, amaute kiang ah pengkul sagih piak in a-om hi (Kil.8:1-2).
Kilakna 6 ah Pathian’ khut taklam a laibuzial Gakkipna Sagihte lak ah Gakkipna Gukna tan Belamnou in a phelna i mu hi. Kilakna 7 ah Gakkipna Sagihna phel ahihma a Pathian mite chiamtehna i mu hi. Pathian’ mite chiamtehna bawl khit ahihnung in tuni i tangteel a i muh Gakkipna Sagihna phelna i mu hi.
Gakkipna Sagihna a hon pheltak in dakkal kimkhat vel van a dai sipsip hi. Pathian ma a angel sagih dinghte kiang a pengkul sagih piak a om tuh Johan in a mu hi. Angel dang khat ahong pai a, aman dangkaeng gimnamtui halna hon tawi hi. Laltutphah ma a om dangkaeng maitam a mi siangthoute thumnate toh latkhawm ding in gimnamtui tampi akiang a piak in a om a, huchiin mi siangthoute’ thumnate toh gimnamtui khu tuh Pathian ma ah a zamtou hi.
Angel in gimnamtui halna kuang ala a, maitam a mei in a hihdim a, huai tuh leitung ah a paikhesuk chih i mu hi. Hiai in mi siangthoute’ thumna Pathian in dawng ahihna a hon theisak hi.Khat veivei mihingte’n i thumnate leng zak a omlou, Pathian in hon dawnglou ahi de aw i chih hun a om sek hi. Huchih hun chiang in tuni i tangteel thute ngaihtuah in, “Pathian taklam a tu eite hon ngetsak” (Rom.8:34) leh “eite adia thumsak ding a hing gige” (Heb.7:25) Jesu Khrist nei ihi chih ngaihtuah zelzel ni.
Unaute zingpha. Tuni hun zatnuam chiat