Hiai thil teng zoh in ka etleh ngai in, mipi tampi kuamah sim seng louh, nam chih leh chi chih leh mi tengteng leh pau tengteng a kipan laltutphah leh Belamnou ma a dingh a, puanngou thupi a kizem a tumnah tawi ka mu a, huan amau aw ngaihtak in, “Laltutphah a tu i Pathian leh Belamnou kiang ah hotdamna,” chi in akikou uhi (Kil.7:9-10)
Leitung a mi 144,000-te zoh in tuni i tangteel a i muh bang in Johan in, “mipi tampi tak” a mu hi. Hiaite tuh sim seng vuallouh a tam nam chih, chi chih, mi chih leh pau chih akipan ahi ua, laltutphah leh Belamnou ma a dingh in puanngou in kizem ua, a khut uah tumnah tawi uhi. Mi 144,000-te tuh leitung a Pathian chiamtehna leh venbitna tangte ahi ua, himahleh tua mipi tampi takte bel gimthuakna thupi akipan hong pawtkhete, a puante uh sawpsiang khin a, Belamnou’ sisan in a ngousakte ahi uhi (7:14).
Rome mite’n vualzohna lahna in tumnah zang zel ua, huchimah bang in hiai mipi tampitakte leng Khrist a vualzohna ngah khinte ahihziak un tumnah tawi in kipak in Pathian leh Belamnou phat in ngaihtak in kikou uhi. Amau tuh Pathian’ laltutphah ma a om in, gilkial-dangtak chih nei nawnlou in a mit ua kipan Pathian in a khituite uh nulsakta ding hi.
Laisiangthou in “gim tampi thuak in Pathian lalgam i lut ding ahi him ahi” (Nas.14:22) achih bang in kumzabi khatna a Rome kumpite sawina thuak mualsuahte kia hilou, tuni’n en leng nat-leh-sat, gilkial-dangtak om nawnlouhna gam zuan a i khualzinna ah gimthuakna tuamtuam i tuahte thuak mualsuah chiat din panla ni.
Unaute zingpha. Tuni hun zatnuam chiat