Huai laibuzial alaktak in, thil hing lite leh upa sawmnih-le-lite, gosem khat chiat leh dangka-eng belhbute gimnamtui a dim chiat tawi in, Belamnou ma ah abokkhup ua, huaite gimnamtui misiangthoute thumna ahi. Huan la thak khat asa uhi: “Laibuzial la a, huai a gakkipnate phel tham na hi; thah in na omta a, chi chih leh pau chih leh michih leh nam chih a mite Pathian a ding a na sisan a na lei tak ziak in (Kil.5:8-9).
Pathian’ khut taklam a om laibuzial hong ding a chitna nei Judah nam apan Humpinelkai, Daving Zung, thahsa hileh kilawm Belamnou ahi chih i genta a, huai tuh Jesu Khrist ahi chih i thei hi.
Belamnou (Jesu) in Laibuzial a lak tak in Cherubte leh Upa 24-te’n Belamnou tuh a bia uhi. Laibuzial la a agakkipnate phel ding a achitna ziak tuh “Thah in na omta a, Na sisan in Pathian a ding in koute na hon lei khinta, chi chih, pau chih, nam chih leh gam chih akipan in, ka Pathian uh a ding in kumpite leh siampute in na hon bawlta” achi uhi (5:9,10).
Belamnou tuh ki sagih leh mit sagih nei a muh a omna in a thuneihna genna kia hilou in, huaite tuh Pathian kha sagihte, leitung munchih a sawlkhiakte ahi uh chih i mu hi. Hiai in a dai dide Belamnou hinawn talou in Thuneihna tengteng toh vaihawmtu ahita chih hon langsak hi (cf.Matt.28:18). Leitung kumpite tung a vaihawmtu Jesu Khrist ahi chih chiantak a latsak in a omta hi (1:5). Aman a sisan a hon leita ahihman in khristiante’n Amah toh vai i hawmta hi (cf.Rom.5:17).
Tuni i tangteel a i muh bang in ganhing 4-te leh upa 24-ten gimlim a dim dangkaeng belkuang a tawite utuh misiangthoute thumna ahi chih i thei a, huaiziak in misiangthoute thumna van a Belamnou leh i Pathian kiang a zak a om ahi chih i theithei hi.
Rome kumpi hattakte’n Pathian misiangthoute sukchimit sawm in pan ana la mah le uh, subei zoulou in a tawp in Rome lalgam in manthat loh hithet hi. Kumzabi khatna a khristiante mah bang in khat veivei i hinkhua ah Pathian in leng hon mangngilhta ahi de aw chia lungkia leh mangbang kisa a i om hun ah leng i thumnate van a zak a om ahi chih thei in, ginom tak in om le hang a tawpna ah i vualzou ngeingei ding hi. Vangam a i vualzoh kia hilou in, leitung a hon bawlgentheite leng i Pathian in thei mahmah ahi chih mangngilh kei ni. Rome lalgam hattak beisak zoupa’n tuni a Amah nung i zuih ziak a hon doutute beina hun ding thei mahmah hi.
Unaute zingpha. Tuni hun zatnuam chiat.