Avualzoupa huchibang in puanngou in akizem dia, bangchi mah in hinna laibu a kipat amin ka hihmang kei ding, ka Pa ma leh a-angelte ma ah amin ka gum ding hi (Kil.3:5).
Tuni i tangteel apan i muh avualzoupa tan ding tuh puannou a kizep ding, hinna laibu apan a min hihmanglouh ding chih leh Jesu’n apa leh a angelte ma a gum ding chih ahi.
Puan ngou tuh a tungtuang mite kiang a piak ahia, nidanglai akipan tuni tan in kipak mite’n a kipahna etsakna in puanngou in kizem tangpi uhi. Hiai bang a kizemte tuh khelhna leh sihnate tunglam pek a Pathian batpih a om dingte ahi uhi.
Hinna laibu a mintuangte bel Pathian angsung a om bang a ngaihsut ahi uhi. Hinna laibu a min tuangloute tuh meidil ah paih in om ding uhi (Kil.20:15). Tanglai a kipan in kumpi minkhumna apan thaimang a om mite tuh gawtna sangpen piak a omte ahi uhi. Huai bang in hinna laibu a min tuangloute tuh migilou, gawtna tang dingte ahi uhi.
A vualzoupa tuh Jesu’n apa leh a angelte mai a gum ding ahihdan leng i mu hi. Jesu’n mah in leitung a adamlai in “mite ma a hon gum peuhmah Ka Pa vaan a om ma ah ka gum sam ding. Himahleh kuapeuh hon kitheihmoh bawl tuh ka Pa van a om ma ah ka kitheihmoh bawl sam ding” achi hi (Matt.10:32-33). Jesu’n hon gup kaan a kipahhuai khristiante a ding in omlou hi. A vualzoupa hiai bang hamphatna tang chiat thei din Toupa’n hon ompih hen.
Unaute Toupa’ ni zingpha. Tuni kikhop nuam chiat