Kei, Johan, Jesu a om haksa thuakna leh lalgam leh kuhkalna a, na unau uleh na tanpihpa uh, Pathian leh Jesu theihpihna ziak in tuikulh gam Patmos kichi ah ka om hi. Toupa ni in Kha in ka om hi, ka nunglam ah aw ngaihtak in pengkul ging bang ka za hi (Kil.1:9-10).
Johan in Jesu Khrist Kilakna a muh lai in Patmos tuikulh ah a om hi. Patmos tuikulh tuh Aegean tuipi tung a om, Ephesa khua apan kigamla law tellou tumlam pang a om ahi. Hiai tuikulh tuh Rome kumpi in dankalh a omte khum bichilhna mun a azat uh ahi hi. John in leng Pathian thu a gupna ziak a gawtna tuak in Patmos tuikulh ah khum in om a, huai laitak in Jesu Khrist kilakna ana mu hi.
I tangteel apan Johan in Kilakna a muh ni Toupa’ Ni ahi chih chiantak in muhtheih hi. Pathian biakna ni ahih toh kiton in biakna lunggulh a khalam thilte ngaihsun a a-omlai tak a John in kilakna mu hi ding in gintakhuai hi. A nunglam a kipan in ngaihtak a houpihna aw in, “na thilmuhte gelhkhia inla Asia a saptuam sagihte kiang ah khak in” a chi hi. Saptuam sagihte tuh Ephesa, Smarna, Pergamos, Thaiatira, Sardis, Philadelphia leh Laodisia ahi uhi.
Sawltak Johan bang in Toupa’ Ni ah khristiante leng kha ah om in, khalam thilte ngaihtuahna hun in zang le hang phatuam mahmah ding hi.
Unaute zingpha. Tuni hun zatnuam chiat