Premillenialism sinsaknate lak a khat Armageddon Kidouna kichi in mite lungsim la ahi ding a, Pathian’ thu gentute hiai toh kisai dotna a mu khalou tawm mahmah ding hi. Laisiangthou ah Armageddon kichi thumal mun khat kia ah kimu a, huai tuh Kilakna 16:16. Himahleh mite lungsim a lakdan leh a kigenthang dan et in Laisiangthou pek teng phial ah kigelh leh a kilawm hial hi.
Premillenialist-te sinsak dan in Rapture zoh kum sagih gimthuakna bei kuan chiang in Antichrist leh a kaihzamte toh Pathian mite kidouna om ding a, huchiin Khrist in a mite panpih in Antichrist zou ding hi. Hiai kidouna mun ding Armageddon, Jezreel Phaizang hi ding a, nuclear galvan leh tulai khovel galvan tuamtuamte zat hi ding, chi uhi. Hiai Armageddon Kidouna a tel ding gamte tuh Antichrist makaihna Europe gam kigawmkhawm (Antichrist Empire), USSR, Egypt leh China chi’n naktak in 1960s leh 1970s lak vel ah gen in om hi. USSR hong puksiat chiang in hun bangtan hiam Russia gendawk khak in omlou a, himahleh a hong hattouh dungzui in gendawk khak in om nawn hi. Kidoupi Nihna ma in China genkhak hilou a, huai hun a galhat Japan kigen hi. Himahleh WW II zoh in Japan telsak nawnlou in China in hon kheng uhi. Hiai kidouna pen khovel gal tuamtuamte, abik in Israel leh a kim a gamte apan buaina piangzelte toh a mekmat ziak un a tel ding gamte leng khovel politics kikhek dungzui in khektouh zelzel in om hi. Tunai nek a Syria bang hong puksiat leh maban ah Armageddon Kidouna a tel ding gamte agen dan uh hong tuamtou zel thei lai hi.
Laisiangthou in Premillenialist-te sinsakna dan a maban a khovel kidouna thupitak om ding genna a Armageddon gen mah ahi diam, ahihkeileh Laisiangthou in bangchi gen ahia chihte enkhawm le’ng ichi hi.
A Thutuun Tangpi:
Kilakna laibu a Armageddon hong kizatkhakna thutuun theisiam masa lou in Armageddon Kidouna ichih theihsiam haksa ding hi. Kilakna laibu tuh Johan in Pathian thu leh Jesu tungtang thu ziak a Patmos tuikulh a a-om lai a, Asia gam a saptuam sagihte kiang a athilmuhte hon laikhakna ahi hi (Kil.1:9-11). Johan in a gelh hun a thil tung lelte (Kil.1:19) leh tungpah ding thute ahi hi (Kil.1:1-3; 22:6,10). Huaiziak in Kilakna laibu hi in Armageddon thu hitaleh achiil a laikhak mute (original recipient) toh kisaikhakna nei, amau theihsiam ding thute ahi chih i chian masak poimoh hi.
Johan in laikhak a gelh hun in khristiante tuh gimthuakna thupitak thuak in a om uhi (Kil.1:9; 2:9-10; 2:13). Huai hun a vaihawmtu Rome Kumpite’n a gamsung kipumkhat sak a tupna ziak un a gammite (citizen) amau adia ginom tak a a-om ua, “toupa” chia a sap ding uh a ngiat uhi. Rome Kumpite tuh Pathian biak abiak a ngai uhi. Kumpi khenkhat in hiai pen kumpite kitawisanna ding a uangtak a nasepna khat dan maimai in ngai mahle uh, Kilakna laibu gelh hun a kumpi hilel Domitian in Pathian bang a biak leh mai-et a om pen nuam a sa hi. Toupa khat, Jesu Khrist kia om ahihman in khristiante’n bel Pathian bang a kumpite biak a, toupa chia sap pen bawl utlou uhi. Khristiante a ding in hiai zahtakna kipiakna dan tuh milim biakna leh Jesu Khrist kitheihmohbawlna suak a, himahleh Rome-te a ding in bel kumpite biak utlouhna pen gamsung adia ginomlouhna leh gammi hihna zuausanna suak hi. Huaiziak in kingeihlouhna tuh pumpelh theihvual hilou hi.
Gamsung adia a ginomna uleh ginomlouhna uh chetna ding in kumpite biakna tuh khristiante tung ah thagum a zat in om a, a be utloute naktak a sawi in om uhi. Khenkhatte thah a om in, khenkhatte gamdang a khum mang a om in, khenkhatte thagum a kumpite tuh pathian ahi uh chih puansak a om in, khenkhatte a neih-leh-goute uh laksak a om in, khenkhatte a vek a thuakkhawm leng a om uhi. Kilakna laibu mahmah ah leng gimthuakna tuak lellel ahihdan uleh tuahtouh pah ding leng nei ahihdan uh muh theih hi (1:9;2:9, 2:10). Pergamos saptuam ah khristian ginom Antipas thah in om a (2:13), saptuam sagihte lak ah saptuam ngate kiang ah sawina thu gen in a om hi.
Hiai bang hun a khristiante thuakna Pathian in mangngilh lou leh atawp a vualzohna amau a hi thouthou ding ahihdan chiamna (assure) in Kilakna laibu Johan in ahon gelh hi. A thuakna uh Pathian in phawklou leh khawksak pihlou ahi chih ngaihdan nei leng khristiante lak ah a om man hial hi. Himahleh Johan in Pathian tuh Rome Kumpite leh amizat giloute zoh vual hilou ahi chih Kilakna laibu ah lak hi.
Drama en dan in kingaihtuah le hang, bung 12 kipatna ah simtute muhtheih ding in a puankhai (curtain) hong kihong in Johan in Rome Lalgam sung a sawina tuamtuam thuak khristiante muhtheih ding in “behind the scene” (puankhai nung lam) a thiltungte hon lak hi. Leitung a thiltungte tuh a taktak in “behind the scene” a Pathian leh Setan kidouna thu ahi chih hon lak hi. Bung 12 bul ah numei, ni a kizem tuh nau paai, nauvei leh suakkhe ding natna a kap i mu hi. Dragon tuh huai numei ma a ding in nau aneih chiang a anau tuh nekzoh vek tum in a om hi. Numei in nam teng tung a sik chianga vaihawmtu ding tapa hon nei khia a, a tapa tuh Jesu Khrist ahi chih i mu thei hi (12:5 cf Sam.2:7-9; Nas.13:33; Heb.1:5). Dragon tuh Setan ahi chih chiangtak in hon gen a (12:9), huchiin sawina thuak khristiante muh theih ding in Satan in a chiil a pat Khrist zoh sawm a apanlaknate lohsam ahi chih a hon lak hi. Setan tuh Khrist tung a vuallel ahihman in Khrist nungzuite lam hong nga in, a sepaihte tuh Khrist nungzui saptuam mite kidoupih ding in a sawlkhia hi.
Khrist’ nungzuite dou ding a Setan vanzat leh sepaihte:
- Tuipi apan Gamsa/Gamsa Khatna (13:1-10): Dragon (Setan) in hiai Gamsa kiang ah thuneihna pia a (13:2); huchiin Gamsa in Pathian gensia in akam hon ka a, misiangthoute a kidoupih hi (13:6,7). Kilakna gelh hunlai a khosate a ding in hiai Gamsa tuh Rome Kumpite (lalgam) ahi chih theih haksa hetlou ding hi. Setan in a vanzat political power, khovel lalgam thahatna zang in Pathian’ misiangthoute sukchimit sak ana sawm hi. Tuni tanpha in leng khovel lalgamte zang in Pathian mite a sawi hi.
- Leitung apan Gamsa/Gamsa Nihna (13:11-18): Hiai Gamsa Nihna in Gamsa Khatna’ thuneihna zang in nna sem a (13:12); leitung a teeng mite Gamsa Khatna’ (Rome kumpite’) lim be ding in thu a pia hi (13:12-14). Rome kumpite thuneihna zang a kumpite’ lim be dia puangkhia leh nasem zawlnei takloute genna ahia; hiai sahkho diklou (Emperor worship) zang in Setan in misiangthoute a dou hi.
- Babulon Thupi, Kizuaknu: Hiai tuh Rome khopi genna ahi. Tangsang sagihte tung a kiphah Rome khopi tuh misiangthoute siluang omna leh sisan suahna khopi ahi. Rome khopi a om Colosseum mawltual ah “Kaisar toupa ahi” chi nuamlou khristiante tuh sahang toh kisualsak in a om ua, a sisan luangte uh mipite’n etnop kisukhalhna ding in a zang uh chih khovel khangthu ah muhtheih hi. Khangthu ah khristiante martyr munpi chi a chiamteh in om hial hi (cf.17:6).
Setan in Khrist nungzuite dou ding in khovel lalgam, Rome kumpite leh sahkho diklou, kumpite lim biakna dia nasemtute hon zang takpi mah hi. Hiai thutuunte lungsim a koih masa in Armageddon Kidouna thu suut ni.
Johan Thilmuhte:
Kilakna 16 ah Pathian thangpaihna Belhbu (Bowls) Sagihte leitung ah sunkhiak a om amu hi. Belhbu Gukna sunkhiak zoh, Belhbu Sagihna sunkhiak ahihma in Kilakna 16:13-16 ah hiaite a hon mu hi.
“Dragon kam a kipan leh gamsa kam a kipan leh, zawlnei taklou kam a kipan in kha nin thum, ukeng bang mai hong paikhia ka muta hi. Amaute dawite kha, thillamdang hihte; khovel pumpi leh lei kumpipate kiang a hong a, Pathian Bangkim hihtheipa ni thupi a kidouna adia amaute pikhawmte ahi uhi. Ngai in, guta bang in ka hongpai hi. Kiveng leh puan tengsa a om a hampha hi, huchilou in zaw vuaktang in a om dia; a zumhuaina a mu kha ding uhi. Huchi in amaute mun khat Hebru pau a ‘Armageddon’ kichi ah a pikhawmta uhi“
(Kilakna 16:13-16).
Hiai Belhbu Gukna a sunkhiak zoh a thiltungte tuh Armageddon thu i theihsiamna ding a poimoh pen khat ahi.
Tang 13 ah ukeng bangbang kha niin thumte Dragon’ kam, Gamsa’ kam leh zawlnei taklou’ kam akipan hong pawt amuh thu Johan in hon gen hi. Ukeng, Dragon leh Gamsa-te tuh a taktak hilou in, gentehna kampau ahi uhi.
Kilakna 12 ah Dragon tuh Setan ahi chih imu a (12:9); Kilakna 13 ah Gamsa nihte tuh khovel lalgam Rome kumpite leh sahkho diklou kumpite lim be dia nasemtute ahihdan uh i genta hi. Kilakna 13 a Gamsa Nihna imuh tuh hiai mun ah zawlnei taklou a gen in om hi.
Tang 14 ah athilmuhte tuh dawite khate ahi, achi hi. Hiaite tuh kha gilou, Setan leh a nungzuite ahi uhi. Amaute tuh Pathian leh a mite toh kidou dia pikhawmte hi uhi. Hiai a kidou dia pikhawm a omte tuh Premillenialist-te sinsakna bang a tulai galvan tuamtuam omte tank, bomb, nuclear galvante toh kidou dia pikhawm a omte hilou uhi. Johan in dawite’ khate ahi chih chiantak in gen a, hiai kha giloute toh kidouna tuh taksa kidouna hilou in, khalam kidouna hi zaw hi (Eph.6:12).
Tang 14 leh 16 kikal, tang 15 ah hiai khalam kidouna a puan tengsate hamphatna hon gen hi. Taksa van hoihtak a kivatna gen hilou in, hiai leng gentehna kampau mah ahi hi. Khalam ah Khrist leh Setan kidouna ah Khrist a kithuamte tuh mi hampha ahihna uh gen hi zaw hi.
Tang 16 ah i thupi, Armageddon thumal genkhak in hong om hi. Laisiangthou a hiai thumal kigenkhakna om sun ahi: “Huchi in amaute mun khat Hebru pau a ‘Armageddon’ kichi ah a pikhawmta uhi“.
Hiai tang ah midang tampite gintak dan in kidouna thu muhkhak in omlou a, kidou dite pikhawmna mun gen ahi lel hi. Hiai thumal kigenna thutuun a thute Dragon, Gamsa leh Ukeng chihte gentehna kampau (figurative) ngen ahihmah bang in hiai Armageddon thumal leng gentehna kampau mah ahi hi.
Armageddon Omna Mun:
Palestine mallam, Galilee Tuipi leh Mediterranean Tuipi kikal ah taang (mountain) poimoh thum om hi. Mediterranean Tuipigei lampang ah Karmel Taang om a, huai tuh Thukhun Lui a zawlnei Elijah leh Baal zawlnei 450-te ki-elna mun ahi. Hiai Karmel taang toh kigamla lou ah Tabor Taang leh Gilboa Taang om uhi. Hiai taang thum kiphuttuahte tehtuah kal ah phaizang om a, Jezreel Phaizang kichi hi. Hiai phaizang ah nidang in (ancient) Megiddo khopi kichi ana om hi. Thukhun Lui mun bangzah hiam ah leng Megiddo genkhak in ana om hi.
Armageddon ichih Hebru thumal Har Megiddo akipan hong kilakhia, Megiddo Taang (mountain of Megiddo) chihna ahi. American Standard Version, NASB leh Laisiangthou version khenkhat ah Har Megedon chih zat in om hi. Greek thumal Ar ichih leng mual genna mah hi a, himahleh a aw gin pen “h” toh kibang sim hi. Hiai Ar leh Megiddo i gawm leh Armageddon chih piang a, Megiddo Taang chihna mah suak hi.
A taktak in Megiddo ichih taang (mountain) hilou in Jezreel phaizang a om, munzang (plain) hizaw hi. Huaiziak in Megiddo taang (Armageddon) kichi a taktak in omlou hi. Himahleh Megiddo khopi leh akim Jezreel phaizang ah khovel mundangte sang in kidouna ana om mun zaw hi. Tanglai apan kum khotawn a kidouna ana om zelna mun hi a; hiai mun ah Pathian’ melmate nakpitak a vuallelh sak in ana om zel uhi. Huaiziak in Kilakna 16 ah Pathian’ melma Setan leh a mizatte vuallelhna ding genna in Armageddon genkhak in ana om hi.
Armageddon Kidouna
Ahihleh bang ziak a Rome kumpite’n khristiante a dou hun ua Armageddon zat a hong om ahi dia? Hiai Armageddon kidouna ichih bang chihna ahi dia?
I gentaksa bang in Megiddo tuh Jezreel Phaizang, Palestine (Israel) mallam a khopi lianlou khat ahi. Thukhun Lui hun in Megiddo leh akim ah Pathian mite toh namdangte kikal ah kidouna poimoh taktak ana om sek a, Pathian’ melmate nakpitak a vuallelh sak in a om sek uhi. Joshua makaih in Israelte’n Megiddo kumpipa ana zou ua (Jos.12:21), Barak leh Deborah in Kanaan kumpi Sisera ana zou in (Vai.5:19, Gideon in mi 300 lel toh Median sepaih tampi ana zou uhi (Vai.6:33ff). Pathian in a deih nawnlouh kumpi Saul tuh Philistia-te toh a kidouna a vuallel in amah leh amah a kithat a (1 Sam.31:8), Juda kumpi gilou Ahaziah tuh Jehu’ thalpeu ziak in Megiddo ah si hi (2 Kum.9:27-28). Juda kumpi hoih Josiah in Pathian kam akipan Neko thugen aman louh ziak in Megiddo Phaizang ah Pharaoh Neko’ thalkap mite’n a kapkha ua, a sihloh hi (2 Kum.23:29-30; 2 Kro.35:22).
A thutuun a gentehna kampau dangte mah bang in Armageddon tuh khalam kidouna a hoihlou tung a hoih avualzohna gentehna ding in hong kizang hi. Megiddo mun a Pathian melmate nakpitak a ana vuallelh zel mah bang un hiai khalam Armageddon Kidouna ah leng Pathian leh a mite mah vualzou uh ahi chih aban i sim leh muhtheih hi. Setan vanzatte Babulon Thupi (16:17-18:24) leh Gamsa nihte tuh suksiat leh zoh in a-om uhi (19:17-21). A tawpna ah, Dragon, Setan mahmah leng Pathian in hon zou hi (20:7-10). Hiai Armageddon Kidouna, Setan leh Pathian kibeihna ah Pathian tuh vualtungtuang in a-om tou ziahziah ding chih Johan in hon lak hi. Hiai hun a khristiante, sawina haksa tak thuakte a ding in hiai thu kipahhuai sang a thuzaknop huai zaw om hetlou ding hi.
Achiil A Simtute A Ding In
Kumzabi khatna tawpkuan lam a Kilakna laibu gelh hunlai a khosa bang in kingaihtuah kawm in Armageddon ngaihsun mah dih. Bang kidouna hi din na ngaihtuah dia?
Kum 2000 nung lam a khovel kidouna tuamtuam om dite na ngaihtuah bat ding gintakhuai lou hi. A poimohna leh a phattuamna leng omlou ding hi. Huaiziak in Kilakna laibu mutu masate ngaihtuah batlouh, amaute adia poimohna leh kisaikhakna omlou a Armageddon kidouna hilhchian kha ihihleh i gendan diklou chihna hi ding hi.
Amau sawitu Rome Kumpite bei kal ngaklah a, amaute apan Pathian in zohna a piak kal ngaklah mahmah kumzabi khatna khristiante a ding in Armageddon kammal theihsiam haksa hetlou ding hi. Kilakna laibu a Johan in ana muh mah bang in Gamsate hihlup in a omta ua, dingkhe ngei nawnlou ding in Rome lalgam tuh AD 475 vel in a pukseta hi. Pathian in a tung ah thukhenna a tungsakta hi. Rome kumpite’n hih chimit a sawm uh mi siangthoute leh saptuam tuh nuaisiah malak ah a khang deuhdeuh zaw hi. Hiai mah tuh Daniel in a mengmuhna a ana muh, Suang khut a seklouh in leitung pumpi a luahsuak, achih ahi (Dan 2:44). Lalgam hattak Rome lalgam abei a, kumpite biakna abei toh kiton in achiil a laikhak mutute a ding in Armageddon Kidouna tuh zoh ana hita hi.
Eite A Ding In
Eite a ding in Armageddon Kidouna bang ahi dia? Khovel galvan tuamtuamte kidounate hi tuanlou. Khalam kidouna, thutak leh thuzuau, adik leh diklou kidouna mah ahi denlai hi. Setan in khovel kumpite leh thil tuamtuam zang in hihbei sawm in hon dou mah leh Pathian’ melmate tuh a tawpna ah suksiat leh zoh in om thouthou ding uhi. Khrist a kithuam a, ginom tak a i om nak leh vualzohna ei a hi thouthou ding hi. Kumzabi khatna khristiante mah bang in khovel ngaih in vuallel a i kilat hun om mahleh Pathian doutute tuh a tawpna ah vuallel thouthou ding uhi.
Leitung ah kumpite leh lalgam hat taktakte ana dingkhe zel ua, huaite zang in Setan in Pathian mite ana sawisa zel hi. Thukhun Lui hi’n Thukhun Thak hun hileh Pathian in a mite vualzohna ana petou zel a, tunitan in Pathian mite leh a saptuam sukbei zoh in ana omlou hi. Khovel kumpi hat taktakte bel sukbei in ana om zel ua, maban ah leng beisak in om tou zelzel ding uhi.
Thukhitna:
Hun paisate ah Premillenialist-te’n Armageddon kidouna tungpahta ding ahi chia khovel thiltung tuamtuamte toh Laisiangthou genkholhnate mekmat a ana gente uh ana dik kei hi. Thukhun Lui hun a Laisiangthou genkholhnate lakkhelhna akipan sinsakna hong piang ahihziak in maban ah leng hong dik tuanlou ding hi. Hun paisate ah kidouna tuamtuamte ana omta a, khovel om lai teng maban ah leng om tou zel lai ding hi. Hiai kidouna tuamtuamte Laisiangthou in Armageddon kidouna chia a gen hilou hi. (Armageddon Kidouna kia hilou in Premillenialist-te’n Rapture toh kisai leh thil tuamtuam a sinsakte uh Laisiangthou a i muhdan toh kikalh tampi om hi. Na simbeh nuam leh hiai link-te click in: Rapture, Second Coming, Kumsang Lalgam).
Armageddon kidouna ah mimal chiat in khalam gal sat ding i nei hi. Adam in ana dou a, Eden huan ah a vuallel hi. Hiai i galsatna ah i vualzoh theihna ding in Pathian in lampi hon bawlsak gige hi: “Mihing thuaktheih val khemna himhim na tung uah a tung ngei kei hi. Pathian zaw a muanhuai ahi, ama’n na thuaktheih val uh khemna na tuah uh a phal kei ding; na thuak theihna ding un khemna peuhah taikhiak na lampi a bawl pah zaw ding hi” (1 Kor.10:13). Hebru laikhak in, “lalgam hihlin vuallouh i tan ziak in…” ana chi hi (Heb.12:28). Mimal chiat a Armageddon gal i satna ah vualzohna tang thei chiat ding in Khrist in kithuam ni (Gal.3:26,27).+++