Misiangthoute a dia thilpiak thu zaw na kiang uah ka gelh a kiphamoh kei: Na kimandan uh ka thei ngal a, huailam thu ah zaw, kum khat a hita Akai a gam thu kimansa in a omta, chi’n, Masidonia gam a mite kiang ah ka hon suang zel a; huchi’n, na phattuamngaihna un a lak ua mi tampi a tawkhalhta hi (2 Kor.9:1,2).
Tuni i tangteel a misiangthoute adia thilpiak chih toh kisai unau khenkhatte’n misiangthoute kia hilou in, ginglou mite a ding leng ahi, achi uhi. Himahleh ginglou mite huamkha lou ahihdan Paul in mun tuamtuam a hiai thilpiak toh kisai a gennate i en ding:
- Misiangthoute adia thohlawm (1 Kor.16:1).
- Misiangthoute nna sepsakna (2 Kor.8:4).
- Misiangthoute adia thilpiak (2 Kor.9:1).
- Misiangthoute taksap awng hukna (2 Kor.9:12)
Hiai Macedonia leh Achaia gam a saptuamte thilpiak Jerusalem a pe dia a hohna ding toh kisai a agennate en le hang:
- Misiangthoute nna sem di’n Jerusalem khua ah ka hoh tadih ding (Rom.15:25).
- Jerusalem khua a misiangthoute lak a gentheite a ding (Rom.15:26).
- Jerusalem khua a dia huhna ka tawi misiangthoute kipahna lam tak a hihtheihna di’n (Rom.15:31).
Macedonia leh Achaia a Jentel saptuamte’n Judate akipan a Pathian thutak mu ua, huchia a khalam thilte uh kikoppih (zuihpih) ahih uleh taksa a agentheihna ua a huh ding mah uh ahi, achi hi (Rom.15:27). Huai kia hilou in thilpiak dongtute’n a petu khristiante ngai mahmah ua, thumpih uh ahihdan leng i mu thei hi (2 Kor.9:14). Thilpiak peutute leh piak a omte kikal ah khalam kizopna hoihtak a om chih muh theih hi. Tulai dan a khristian kichi denomination tuamtuamte om nailou ahihman in khristiante ngai mahmah a, thumpih thei tuh khristiante mah ahi ding uh chih achiang hi. Khristiante sawi a, sukbei sawm Judate’n thumpih hetlou ding uhi. Huaiziak in Paul in misiangthoute a ding achih bang mah in a dongtute tuh khristian, misiangthoute mah ahi uh chih a chiang a, gingloute huamkha lou hi.
Unaute zingpha. Tongdam khua a om phamta unaupa Thangruai tapa unaupa Ginkhansiam, zan nitak a hon omlouhsan i suun kawmkawm in tuni hun zatnuam chiat.