Mi genhakte, lungtang leh bila zeksumlouhte aw, chiklai peuh in Kha Siangthou na dal gige uh; na pipute uh hih bangbang in na hih nilouhlouh uh. Na pipute un zawlneite lak ah kua ahia a sawi louh uh? Mi Diktak hongding thugen khollte a hihlum ua; huai Mi Taktak tuh mansakte leh thatte noumau tu in na hi uhi (Nas.7:51,52).
Tuni a i tangteel tuh Stephen’ thugen ahi. Stephen tuh Nasepte 6 a niteng thilhawm thu a phunna a om lai a, enkai dia Kha leh pilna a dim mi sagih a telkhiakte ulak a khat ahi hi. Hehpihna leh thilhihtheihna a dim mi ahia (Nas.6:8), a thugente kuaman a sel thei kei uhi (6:10). Himahleh a thugen ngaihkhiak a zuih sang in Juda makaite a thangpai zaw ua, huchiin mi guai in Mosi leh Pathian a gensia a chisak zaw sop uhi.
Khalam khomulou makai vaihawmte tuh hangsan tak a hon tai in, tuni a i tangteel hon genkhum hi. Chihtaktak a thutak a dinpih tuh amah a ding in sihna hong hi a, khristiante a ding in martyr masapen a hong suak hi.
I leitung hinna a bei chiang in Pathian kiang ah tangtawn in i khawl tawldamta ding chih tuh khristian ten i kinepna ahi hi. Himahleh leitung ah leng damsawt deuh a Pathian adia a tam theipen sepkhiak utlou kuamah ki-omlou ding hi.
Stephen hinkhua i et leh Pathian in zang tom lua a bang hi. Himahleh Pathian in hun sawtlou chik zang bang mahleh a mohpuakna tuh ginom tak in a zou hi. Pathian a ding a i kizatna a sawt leh tom thu hilou in, i sep sung in chitak leh ginom tak in i sem hia chih Pathian in en zaw hi. Huaiziak in Pathian’ adia i panna ah asawt-atom hilou in Amah thupina ding in chitaktak leh ginom tak in ka sem na hia chih ki-etchian zelzel poimoh hi.
Unaute zingpha. Tuni hun zatnuam chiat.