Huan, Jesu’n a dawng a, a kiangah, Kuapeuh hiai tui dawn a dangtak nawn ding uh; Kuapeuh a kiang a ka piak ding tui dawn bel, a dangtak ngei kei ding; ke’n a kiang a tui ka piak ding tuh amah ah tuinak a hong hi ding a, khantawn hin pha in a kikhohtou ding, a chi hi (Jn.4:13,14).
Samari numei tuh Jakob’ tuileh (well) ah a ngeina bang in tui tawi ding in hong kuan hi. Himahleh hundang banglou in, tuni i tangteel a i muh bang in tuhun kia in bang ziak dangtak thakthak ahia chih hilh ding Mipa hon tuak kha hi. Tui tawi dia hong kuankuan ngai nawnlou ding in a dangtakna beisak thei ding thil a hon tah (offer) hi.
I vek un tuileh hoh gigena i nei chiat uhi. Khenkhatte a ding in zahmohthu (pornography) bang, khenkhat leuleu a ding in career bang, ahihkeileh siamsinna leh nek-leh-tak zonnate hi kha ding hi. Himahleh hiai tuileh tengteng khat lel leng hon lungkimsak zou omlou in, i dangtak zelzel hi. Adiktak agen in, lungkimna taktak leng hon pe theilou ding uhi.
Hiai Samari numeinu’ tuileh tuh pasal hi kha ding hi. A dangtakna beisakna ding in pasal 6 toh kiteng kha hi. Himahleh a lungsim hawmna taktak bei thei tuanlou in, a lungtang ah meima tampi om zaw a bang hi. Hiai a vangsiatna in a tuileh ah muanzoh louhna tunzaw hi kha ding hi. Tulel a a ompih pasal toh a kitenlouhna un pasal a muanzoh louhna nei ahi diam chih bang hon lak thei hi.
Jesu’n hehsanna mit in a en kei a, hehpihna leh lainatna mit in a en zaw hi. Mikhial ahi chih a dik tham hi. Angkawmna hinkhua a akhosak kia hilou in, milim bia, a lungsim thawmhauna Pathian lou thildang a suklungkim sawm ahi hi. Himahleh Jesu’n a hehpihna toh hiai mikhialnu kiang lam zuan in a hoihzaw, a lungkimsak taktak thei thil a tahzaw hi.
Jesu’n tuni ei kiang ah leng hiai bang hih ut hi. Pathian lou a lungkimna zong in om sek mah lehang, lungkimna taktak i mu tuan kei hi. Jesu’n “Ka kiang ah hong pai unla, lungkim un! Ka itna dawn le uchin hiai na tuileh ua na hong pai uh ngai nawnlou ding ahi!” chi’n hon chial hi.
Toupa, hinna tui na hon piak ding ka dawn nuam uhi! Thildangte a hawm vek ahihdan hon theisak chiat in!
Unaute zingpha. Tuni hun zatnuam chiat.