Huan, ngai un, mi khat a min Joseph, vaihawmmi, mi hoihtak, diktak, Judate khua khat Arimathai a kipan a om a, A vaihawm uah leh a thil hih uah leng a ki-awi kei him a. Pathian gam a lamen gige a. Huai mi tuh Pilat kiang ah a hoh a, Jesu luang a ngen a. Huan a lakhia a, puanmalngat in a tuam a, han, suang khuakkuak, kuamah sial ngei nailouhna ah, a sial hi (Lk.23:50-53).
Tuni i tangteel a i muh Arimathai khomi Joseph tuh Jesu luang vuitu mi poimoh tak khat ahi. Mi hausa (Matt.27:57) himahleh mi hoihtak leh mi diktak mi ahi hi. Judate kihtak ziak in alangtang in Jesu zui ngamlou a, himahleh a sim zuih hi (Jn.19:38). Jesu khailum ding a ngen, Juda vaihawmte lak a mi himahleh a thilhih uah a ki-awi kei hi. Nicodemus, zan lai a Jesu va mupa (Jn.3) toh pai in Jesu luang Pilat kiang a ngen in a vui uhi (Jn.19:39).
Mihing ten mi hausa leh khovel a dinmun sang deuh neite diktatlou deuh, Pathian thu leng awilou deuh; mizawng leh gentheite Pathian in it a deihsak tuam deuh dan in ngaihdan kinei tangpi hi. Himahleh hiai ngaihdan dikkim lou ahihdan tuni i tangteel apan muh theih hi.
Tuni i tangteel a Joseph mah bang in Pathian’ mi ginom leh makai thupi taktak Joseph, Daniel leh Ezekiel ichihte leng ginglou kumpite nuai a dinmun sangtak neite ana hi uhi. Khovel a dinmun lian leh sangtak nei ten Pathian’ thu zui a, Amah adia hong kizat chiang un ginglou mite lak ah leng midangte sang mah in mite thuzohtheihna (influence) nei hoih zaw uhi. Hiaiziak leng ahi ding Khasiangthou pina a Thukhun Thak gelhtu ten Ethiopia kumpi Kanda nuai a mi chilgeh laltak leh sepaih za heutu Cornelius pianthakna bang chiangtak in hon gelh se uhi. Huaiziakin dinmun sangtak nei khristian-te bang Pathian a ding in saptuam sung ah hong kizang tam le uh taksa leh khalam ah masawnna thupitak om ding hi.
Unaute sunnungpha🙋♂️. Tuni hun zatnuam chiat.